Муус устар 1 күнүттэн омук сириттэн киирэр түһээнэ (пошлина) суох мал-сал, табаар (посылка) сыанатын алын кирбиитин (порог) 1000 евроттан 200 евроҕа диэри түһэрэр былааннаахтар. Ол туһунан РФ Федеральнай томоженнай сулууспата иһитиннэрэр.
Ол аата Евразиятааҕы экэнэмиичэскэй хамыыһыйа быстах кэмҥэ алын кирбиини 1000 евроҕа диэри үрдэтэр быһаарыыта үлэлээн бүттэр.
Саҥа быраабыла “Арассыыйа почтата” уонна экспресс-таһаҕасчыттар Арассыыйа олохтоохторугар кыраныысса таһыттан киллэрэр табаардарыгар дьайар. Судургутук эттэххэ, муус устар 1 күнүттэн омук сириттэн 200 евроттан элбэх суумалаах уонна 31 киилэттэн элбэх ыйааһыннаах табаары сакаастыыр буоллаххына, булгуччу түһээн-нолуок бөҕөнү төлүөхтээххин. Ол түмүгэр, үгүс табаар, ол иһигэр дьиэҕэ-уокка туттуллар мас-сал, табаар, тиэхиньикэ, сүүһүнэн көрүҥүн сыаната хас эмэ бүк үрдүөн сөп.
Ити туһунан “Парлемент хаһыата” суруйар.
