Бүгүн, муус устар 2 күнүгэр, сүдү ырыаһыт, СӨ Норуодунай, РФ уонна СӨ Үтүөлээх артыыһа Нина Чигирева олохтон туораата. Ол туһунан СӨ Култуураҕа уонна духуобунай сайдыыга министиэристибэтэ иһитиннэрдэ.
Нина Чигирева 1954 с. сэтинньи 15 күнүгэр Амма улууһун Эмис бөһүөлэгэр төрөөбүтэ. 1979 с. Саха сиринээҕи муусука училищетын, ол кэннэ 1987 с. М.И. Глинка аатынан Новосибирскайдааҕы судаарыстыбаннай консерваторияны бүтэрбитэ.
1987 с. өрөспүүбүлүкэтээҕи опера уонна балет судаарыстыбаннай тыйаатырыгар сүрүннүүр солиһынан үлэҕэ киириэҕиттэн, айымньылаах, сыралаах айар-тутар үлэтэ саҕаламмыта. Нина Чигирева опера тыйаатырын сыанатыгар турбут барыа кэриэтэ опера меццо-сопрано баартыйаларын киэҥ далааһыннаахтык, киһи өйүгэр-сүрэҕэр умнуллубаттыы хатанар курдук чаҕылхайдык, дириҥ ис хоһоонноохтук уонна үрдүк иэйиилээхтик толорон, бар дьон билиниитин, тапталын ылбыта, ытыктыыр, сүгүрүйэр артыыһа буолбута.
Нина Чигирева Франция, Австрия, Швейцария, Япония, АХШ, Киргизия, Казахстан, о.д.а. дойдулар бастыҥтан-бастыҥ түһүлгэлэригэр ыллаабыта. Арассыыйа эрэгийиэннэрин уонна СНГ дойдуларын туһунан этэ да барыллыбат. Оттон дойдубут тэбэр сүрэхтэрэ буолбут Москуба уонна Санкт-Петербург куоракка мэлдьи күүтүүлээх ыалдьыт буолара. Бетховен саалатын, Чайковскай аатынан судаарыстыбаннай концерватория Улахан саалатын, Рахманинов аатынан Кэнсиэртиир саала, Скрябин, Шаляпин, Глинка түмэллэрин, Гнесиннэр ааттарынан Арассыыйа муусукаҕа академиятын, Санкт-Петербурга Глинка аатынан филармония ааннара киниэхэ мэлдьи аһаҕас буолаллара. Кини талааныгар, бэл, аан дойду таһымнаах араас ыһыаттары-артыыстары күннэтэ көрөр-истэр киин сир муусуканы таптааччылара сүгүрүйэллэрэ, дохсун ытыс тыаһын бэлэхтииллэрэ.
Нина Чигирева муусука-тыйаатыр ускуустубатыгар киллэрбит, ситиспит кылаатын учуоттаан, үгүс наҕарааданан бэлиэтэммитэ: СӨ Үтүөлээх артыыһа (1989), СӨ Норуодунай артыыһа (2000), РФ Үтүөлээх артыыһа (1993), Норуоттар доҕордоһууларын уордьана, “Гражданскай килбиэн” бэлиэ, СӨ Бэрэсидьиэнин кырааматата, СӨ Ил Түмэнин бочуоттаах кырааматата, Б.Ойуунускай аатынан СӨ Судаарыстыбаннай бириэмийэтэ (2019).
Сүдү ырыаһыт, бар дьон тапталлаах артыыһа күн сириттэн күрэммитинэн, бары аймахтарыгар-урууларыгар, чугас-истиҥ дьонугар дириҥ кутурҕаммытын тиэрдэбит.
