Муус устар 2 к. СӨ Бэтэринээр управлениетын салайааччытынан Игнатий Колодезниковы аныыр туһунан Ил Дархан Айсен Николаев ыйааҕа таҕыста. Игнатий Владимирович ССТХА-ны 2006 с., бүтэрэн, бэтэринээр быраас идэтин баһылаабыт.
Үлэтин санитар-бэтэринээр быһыытынан 1999 с. Томпо оройуонун Мэҥэ Алданнааҕы бэтэринээр учаастагар саҕалаабыт. Хаҥалас Төхтүрдээҕи учаастагар бэтэрээн бырааһынан, СӨ бэтэринээринэй уонна фитосанитарнай кэтээн көрүү Федеральнай сулууспатын управлениетын РФ судаарыстыбаннай кыраныыссатыгар уонна тырааныспарга судаарыстыбаннай бэтэринээринэй кэтээн көрүүгэ отделын судаарыстыбаннай иниспиэктэринэн, 2013 сылтан – ити управление Соҕуруу оройуоннар икки ардыларынааҕы салаатын начаалынньыгынан, 2018 сылтан – Нерюнгри оройуонун ТХУ-тун салайааччытынан үлэлээбит. Ол кэнниттэн Саха өрөспүүбүлүкэтигэр бэтэринээринэй уонна фитосанитарнай кэтээн көрүү Федеральнай сулууспатын управлениетын салайааччытын солбуйааччыта буолбут.
2022 сыл алтынньытыттан саҥа дуоһунаска ананыар диэри Амур уобалаһыгар уонна СӨ бэтэринээринэй уонна фитосанитарнай кэтээн көрүү Федеральнай сулууспатын РФ судаарыстыбаннай кыраныыссатыгар уонна тырааныспарга судаарыстыбаннай бэтэринээринэй кэтээн көрүүгэ отделын начаалынньыгын солбуйааччытынан үлэлээбит.
Татьяна Захарова-ЛОҺУУРА.
