Муус устар 4 күнүгэр СӨ Бырабыыталыстыбатын бэрэссэдээтэлин солбуйааччы Сергей Местников Өрөспүүбүлүкэҕэ 2024-2025 сылларга оһуокайы харыстааһын уонна сайыннарыы биир тиһиктээх торумун бигэргэттэ.
Ол быһыытынан, бу сыл 4 кыбаарталыгар оһуокайы 2030 сылга диэри харыстааһын, сөргүтүү уонна сайыннарыы үлэтин сыалын, соруктарын уонна хайысхаларын быһаарар Кэнсиэпсийэни бигэргэтиэхтэрэ.
Иккис кыбаарталга Өрөспүүбүлүкэтээҕи норуот айымньытын уонна социально-култуурунай технология дьиэтигэр оһуохайы этээччилэр айар кыһаларын тэрийиэхтэрэ. 2025 сылга Саха сирин норуоттарын тылларын уонна култуураларын нэһилиэстибэтин сыыппараҕа көһөрүү киинигэр оһуокайы этии үгэстэрин үөрэтии уонна харыстааһын сыыппаранан пуондатын тэрийиэхтэрэ.
Кэлэр сылга оһуокай төрүт үөскээбит сирдэринэн култуурунай-туристическай маршруттары толкуйдуохтара уонна улуустарынан оһуокай көрүҥнэрин уһултарыыга «Түөлбэ оһуокайа» эспэдииссийэни ыытыахтара. Маны таһынан, оһуокай билимнии-популярнай энциклопедиятын бэлэмнээн таһаарыы, оһуокайы тарҕатыыга туһуламмыт араас таһымнаах күрэс, бэстибээл, аахсыйа ыытыллара былааннанар.
Санатар буоллахха, Ил Дархан Айсен Николаев ыам ыйын 25 күнүгэр Оһуокай күнүн олохтуур туһунан Ыйаах таһаарбыта уонна сэттэ бастыҥ оһуокайдьыкка 30 тыһ. солк. сууммалаах ыйдааҕы истипиэндьийэни олохтообута.
Сонун төрдө: СӨ Бырабыыталыстыбатын уонна Ил Дарханын пресс-сулууспата
