Саха сиригэр Аҕа күнэ бэлиэтэнэр муус устар 7 күнүгэр «Аҕа күрэҕэ-2024» 24-с төгүлүн ыытыллан түмүктэннэ. Тэрээһин икки күн устата Мэҥэ-Хаҥалас улууһун Майа сэлиэнньэтин «Ураһалаах» диэн сиригэр буолан ааста. Манна барыта 17 улуустан аҕа уонна уол састааптаах 19 хамаанда кытынна.
«Визитка» түһүмэххэ Нам улууһуттан Дмитрий уонна Артур Семеновтар бастыҥ буоллулар. «Бэрэбинэни сулуйууга» Уус Алдантан Руслан уонна Илья Поповтар кыайдылар. Ууну кутааҕа оргутууга барыларыттан түргэнник Мэҥэ-Хаҥаластан Айаал уонна Айсен Карамзиннар хамсаннылар. Икки тутаахтаах эрбиинэн бэрэбинэни эрбэтиигэ Амма улууһуттан Николай уонна Аркадий Федоровтар барыларын куоттулар. Ойбон алларыыга Мэҥэ-Хаҥаластан Николай уонна Дамир Поповтар бастаатылар. Мас хайытыыга бастыҥ түмүгү Сунтаар улууһуттан Степан уонна Гром Корниловтар көрдөрдүлэр. 5 миэтэрэлээх остуолбаҕа барыларыттан түргэнник Мэҥэ-Хаҥаластан Айаал уонна Айсен Карамзиннар таҕыстылар. Саҥа киирбит «Булчут биатлона» түһүмэххэ Хаҥаластан Владислав уонна Святослав Пермяковтар кыайдылар.
8 түһүмэх көрдөрүүтүнэн кыайыылаах тахсыбыт Николай уонна Аркадий Федоровтар 300 тыһ. солкуобайдаах бириэмийэни туттулар. Кинилэр бу күрэскэ быйыл үсүһүн кыттыбыттарын бэлиэтиибит. Иккис миэстэни ылбыт Дмитрий уонна Дьулусхан Ивановтар 150 тыһ. солкуобайы туттулар. Оттон үһүс миэстэлээх Руслан уонна Илья Поповтар 100 тыһ. солкуобайынан наҕараадаланнылар.
Сонун төрдө: СӨ Үлэҕэ уонна социальнай сайдыыга министиэристибэтэ
