Амма улууһугар бэс ыйын 20-21 күннэригэр ыытыллыахтаах Олоҥхо ыһыаҕын биир умнуллубат көстүүтүнэн 100 самодеятельнай мусукаан саха төрүт үстүрүмүөнүгэр – кырыымпаҕа оонньуута буолуоҕа. Онно анаан мас уустара 2020 сылтан саҕалаан 70 кырыымпаны оҥорон бэлэмнээтилэр.
Маны сэргэ, сыл устата кырыымпаҕа оонньууга сатабыл дьарыктара ыытылыннылар. Онно Амматааҕы ускуустуба оскуолатын уһуйааччыта Василий Неустроев, «Кыл Саха» ансаамбыл салайааччыта Анна Томская, Олоҥхо тыйаатырын артыыстара Айсен Кысылбаиков, Прокопий Сыроватскай үлэлээтилэр.
Ыһыахха норуот худуоһунньуга Михаил Носов «Сахалар XVII-XX үйэтээҕи таҥастара уонна симэхтэрэ» хартыыналарын хатылаан көрдөрүү былааннанар. Манна Амма улууһун 14 муниципальнай тэриллиитин декоративнай-прикладной ускуустубаҕа маастардара кытталлар. Хас биирдии нэһилиэк 400 миэтэрэлээх ситии өрөн туттарыахтаах. Маны таһынан, олбохтор тигиллиэхтээхтэр.
Сүрүн тэрээһиҥҥэ бэлэмнэнии иитинэн, улууска Олоҥхо испэктээгин туруорууга уонна олоҥхоһут Чээбий төрөөбүтэ 155 сааһыгар туһуламмыт бэстибээл ыытылынна.
Сонун төрдө: CӨ Бырабыыталыстыбатын уонна Ил Дарханын пресс-сулууспата
