СӨ Бырабыыталыстыбатын уонна Ил Дарханын дьаһалтатын салайааччытын Саха сирин норуодунай учуутала, РСФСР уонна САССР үтүөлээх учуутала Николай Афанасьев аатынан бириэмийэтин туттардылар.
Дьаһалта салайааччыта Георгий Михайлов бириэмийэ төрөөбүт дойдуну үөрэтиигэ уһуйар педагогтарга ананарын эттэ. Быйыл бириэмийэни Амматааҕы лиссиэй географияҕа уонна биологияҕа учуутала Алена Быстроваҕа ананна.
«Үөрэх эйгэтигэр 30 тахса сыл үлэлиибин. Оҕолорго уонна педагогтарга кыраайы үөрэтэр тэрээһиннэри ыытабын. Ону таһынан, араас интэриэһинэй билим бырайыактарынан дьарыктанабыт. Соторутааҕыта үөрэнээччилэрбин кытта Амма улууһун күөллэрин атлаһын оҥорон таһаарбыппыт. Онон, бу кыайыыга үөрэнээччилэрим кылааттара эмиэ баар», — диэн учуутал үөрүүтүн үллэһиннэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
