Киир

Киир

СӨ киһи быраабын көмүскүүр боломуочунайын уонна СӨ ИДьМ көҕүлээһининэн, ыам ыйын 16 күнүгэр Дьокуускайга «Олоххун уларыт!» (уруккута «Дьиэҕэ төннүү») дьиэтэ-уота, үлэтэ-хамнаһа суох ускул-тэскил сылдьар дьоҥҥо көмөлөһөр соруктаах аһымал аахсыйа 12-с түһүмэҕэ ыытыллыа.

Бу күн сарсыарда 10 чаастан киэһэ 17 чааска диэри Федор Попов уул. 8/1-с дьиэтин аттынааҕы «Хоттей» кафе таһыгар исписэлиистэр үлэлиэхтэрэ. Ол курдук, көмө көрдөөччүлэри фтизиатр, терапевт, нарколог көрүөхтэрэ, хаан анаалыһын ылыахтара, флюорограммаҕа түһэриэхтэрэ.  Маны сэргэ, уйулҕа идэлээхтэрэ, докумуону сөргүтүү, үлэнэн хааччыйыы, приюкка киллэрии өттүгэр исписэлиистэр үлэлиэхтэрэ уонна, биллэн турар, итии аһылык уонна ыраас таҥас түҥэтиэхтэрэ.  

Маннык аахсыйа 2018 сылтан ыытыллар. Барыта 900 киһи көмө көрдөөбүтүттэн 90 киһи көмө ылан олоҕун үчүгэй өттүгэр уларыппыт. Ким эрэ үлэҕэ киирбит, ким эрэ дьиэ кэргэнигэр, дойдутугар төннүбүт. Үгүс киһи биэнсийэтин оҥотторбут, докумуонун сөргүппүт.

Сонун төрдө: СӨ киһи быраабын көмүскүүр боломуочунайын пресс-сулууспата

Санааҕын суруй