Быйыл ыам ыйын 25 күнүгэр Саха сиригэр Оһуокай күнэ аан маҥнайгытын бэлиэтэниэ. Бу күн Ил Дархан Айсен Николаев Ыйааҕынан 2023 сыл балаҕан ыйын 7 күнүгэр бэлиэтэммитэ. Бэлиэ күҥҥэ өрөспүүбүлүкэ үрдүнэн ыытыллыахтаах тэрээһиннэр торумнарын бүгүн пресс-кэмпириэнсийэҕэ кэпсэттилэр.
Ол курдук, Оһуокай күнүн бары улуустарга, нэһилиэктэргэ, үөрэх кыһаларыгар уонна култуура тэрилтэлэригэр бэлиэтиэхтэрэ. Өрөспүүбүлүкэтээҕи «Оһуокай» айар уопсастыба бэрэссэдээтэлэ Александр Данилов сүрүн тэрээһининэн Саха сирин оскуоланы бүтэрээччилэрин “флешмобтара” буоларын иһитиннэрдэ. Бу күн оҕолор саҥа олох саҕаланыытын түстээн оһуокай таһаарыахтара.
Маны таһынан, Дьокуускайга ыам ыйын 25 күнүгэр 17 чаастан Кыайыы болуоссатыгар Добун Оһуокай буолуоҕа. Үҥкүү тылы түөрт Аан Дархан – Афанасий Алексеев, Семен Черноградский, Егор Осипов уонна Розалия Тихонова таһаарыахтара.
Хаартыска: ЯСИА
Бэйэ кэр.
