Баартыйа Саха сиринээҕи салаатын толоруулаах кэмитиэтин салайааччыта Сулустаан Заболоцкай иһитиннэрбитинэн, ыам ыйын 13 күнүгэр “Ньыгыл Арассыыйа” баартыйа Саха сиринээҕи салаатын сэкирэтээрэ, Ил Дархан Айсен Николаев биэрбит сорудаҕынан, бэрт суһаллык 4 туонна 878 киилэ гуманитарнай таһаҕас хомуллубут. Ол туһунан ыам ыйын 19 күнүгэр баартыйа пресс-сулууспата суруйда.
“Бүгүн Өлүөхүмэҕэ 2 туонна кэриҥэ гуманитарнай көмө барда. Билигин Намҥа 3 туонна кэриҥэ бараары турар (күннээҕи олоххо туттуллар мал-сал, ас-үөл, орон таҥаһа). Баартыйа олохтоох салааларын кытта билсэ олоробут. Биллэн турар, ити иэдээн дьону сомоҕолоото – биһиэхэ Ил Түмэн, Гордума, “Ньыгыл Арассыыйа” баартыйа дьокутааттара, Кыһыл кириэс олохтоох салаата, волонтердар, дьон-сэргэ көмөлөһөр. Үлэ салҕанар”, – диэбит Сулустаан Заболоцкай.
Өрөспүүбүлүкэ суһал ыстаабыгар эппиттэринэн, ыам ыйын 19 күнүттэн уу кыраалаан түһэн барбыт. Онон, өтөр балаһыанньа көнүө диэн эрэнэллэр.
Ити күн буолбут ыксаллаах быһыы-майгы мунньаҕар Ил Дархан Айсен Николаев бырабыыталыстыба чилиэннэригэр уонна дьокутааттарга сүрүн болҕомтону суолу-ииһи, олоҕу-дьаһаҕы хааччыйар эбийиэктэри чөлүгэр түһэрэр үлэҕэ, хоромньуну ааҕыыга ууралларыгар эттэ.
