Бүгүн, ол эбэтэр ыам ыйын 20 күнүгэр, өрөспүүбүлүкэ Ил Дархана Айсен Николаев кэккэ улуустарга халаан уустук балаһыанньатынан сибээстээн, эрэгийиэн таһымнаах ыксаллаах быһыыны-майгыны биллэрдэ.
“Ыйаах быһыытынан, өрөспүүбүлүкэ бырабыыталыстыбатын чилиэннэригэр нэһилиэнньэлээх пууннары уонна экэниэмикэ эбийиэктэрин чөлүгэр түһэрэр бары миэрэни ылынарга, нэһилиэнньэ олоҕун-дьаһаҕын хааччыйарга уонна эмсэҕэлээбиттэргэ социальнай уонна матырыйаалынай көмөнү көрөргө сорудах бэриллиннэ”, – диэн Ил Дархан телеграм-ханаалыгар суруйбут.
Бүгүҥҥү туругунан, Өлүөнэ көмүөлэ, сүрүннээн, Уус Алданынан, Намынан уонна Кэбээйинэн ааһар.
Ааспыт күннээх түүн иһигэр Өлүөхүмэ улууһун 1-кы Нөөрүктээйи нэһилиэгэ ууттан толору босхолонно. Нам улууһугар уу таһыма кыралаан түһэн эрэр. Халааан содулун туоратарга быыһыыр, чөлүгэр түһэрэр үлэ салҕанар.