Ил Дархан Айсен Николаев үлэтинэн Нам улууһугар бара сылдьан, Хатырык бөһүөлэгин ууттан эмсэҕэлээбит дьоно быстах кэмҥэ олорор пууннарыгар тиийэ сырытта.
Быстах кэмҥэ олорор пуун Хатырык оскуолатыгар баар. Ыам ыйын 20 күнүнээҕи туругунан, онно 140-ча киһи олорор. Кинилэр итии аһынан, орон таҥаһынан, уунан-бородууктанан, о.д.а. күннэҕигэ туттуллар малынан-салынан хааччыллан олороллор.
Ил Дархан Нам улууһун олохтоохторун кытта кэпсэтиитигэр матырыйаалынай уонна гуманитарнай көмө толору оҥоһуллуоҕун туһунан эттэ.
“Ирдэнэр кээмэйдээх көмөнү толору оҥоруохтара диэн эрэниҥ. Сөргүтэр, чөлүгэр түһэрэр үлэ номнуо саҕаланна – сарсыардаттан Хатырыкка тиийэр суол арылынна, суол-иис үлэтэ өссө ыытыллыа. Бу күннэргэ халаан таһаарбыт хоромньута толору ааҕыллыа, ол кэннэ толуйар харчы төлөнүөҕэ”, – диэтэ Айсен Николаев.
Ил Дархан ити сырыытын кэмигэр 1990-с сс. Хатырык бөһүөлэгин салайбыт, билигин 87-с сааһыгар сылдьар Данил Пахомовы кытта көрүстэ. Данил Данилович кэпсээбитинэн, урут маннык таһымнаах уу Нам улууһугар өссө кэлэ илигэ эбитэ үһү.
