Ыам ыйын 23 – 25 күннэригэр Дьокуускай – Аллараа Бэстээх хайысханан тургутар паромнар сылдьыахтара, барыта этэҥҥэ буоллаҕына уонна өрүс ырааһырдаҕына, ыам ыйын 25 – 27 күннэрин эргин сайыҥҥылыы үлэлээн барыахтара.
“Паромы Якутии” ХЭУо салайааччыта Николай Ефимов “Сахадэйгэ” иһитиннэрбитинэн, быйыл уҥуор туоратар тарыып сыаната ыарыахтаах.
“Биллэн турар, сыана ыарыаҕа. Хомойуох иһин, ороскуот элбии турар. Онно паромщиктар букатын кыттыгастара суох: потребительскай корзина ыараабытын курдук ыарыыр. Аны, уматык сыаната олус таҕыста, оттон үлэһиттэр хамнастарын үрдэтиэххэ наада. Ол барыта сыанаҕа дьайар. Бу күннэргэ Сыана бэлиитикэтин судаарыстыбаннай кэмитиэтэ сыананы бигэргэтэр бирикээһэ тахсыаҕа”, – диэбит Николай Ефимов.
Кини кэпсээбитинэн, ыам ыйын 21 күнүттэн Дьокуускай причалларын, быһа холоон 23 чыыһылаттан Аллараа Бэстээх киэннэрин оҥоруохтаахтар.
“Быһыы-майгы хайдаҕыттан көрөн, ыам ыйын 23 күнүгэр тургутар эрийэсэни оҥоруохпут. Оттон дьону уонна көлөнү, муус хайдаҕыттан көрөн, ыам ыйын 23 – 25 күннэриттэн тиэйэн барыахпыт”, – диир Ефимов.
Эбэн эттэххэ, Дьокуускай – Аллараа Бэстээх хайысханан быйыл 11 паром, Хаҥаластан (Дьокуускай) Суоттуга диэри – 2, Хачыкааттан Мохсоҕоллоохххо диэри – 4 паром сылдьара былааннанар.
Паромнар сылдьар бириэмэлэрин, тарыып сыанатын уонна да атын иһитиннэриини өтөр “Паромы Якутии” сыһыарыыга көрүөххэ сөп буолуоҕа.
Санаттахха, былырыын паром сыаната эмиэ ыараабыта. Ол курдук, дьоҕус көлө киэнэ 150 – 200 солк. ыараан, 650 солк. буолбута. 2 туоннаҕа диэри ыйааһыннаахтарга – 950 солк., 2,3 туоннаҕа диэри – 1100, онтон үөһэ – 1400 солк. этэ.
