Киир

Киир

Бу нэдиэлэнэн Саха сирин үгүс улууһугар оттук дьыла түмүктэниэхтээх. Ол гынан баран, ититии арахсыан иннинэ салгын тэмпэрэтиирэтэ 5 күн устата +8 кыраадыстан сылаас туруохтаах. Кииннэммит ититии хайдах, хаһан арахсыахтааҕын туһунан СӨ ДьУоХХ пресс-сулууспата иһитиннэрэр.

 

Дьокуускай куорат административнай тутууларыгар уонна таас дьиэлэригэр оттук дьыла ыам ыйын 23 күнүгэр түмүктэнэр, оттон мас тутууларга уонна социальнай эбийиэктэргэ – бэс ыйын 1 күнүттэн.

Ыам ыйын 21 күнүнэн кииннэммит ититии Чурапчы улууһугар арахсар. Ыам ыйын 22 күнүттэн – Аммаҕа, Намҥа, Уус Алдаҥҥа, Тааттаҕа уонна Мэҥэ Хаҥаласка.

Ыам ыйын 23 күнүгэр оттук дьыла Томпоҕо түмүктэниэ, ыам ыйын 25 күнүгэр – Ньурбаҕа уонна Сунтаарга, ыам ыйын 26 күнүгэр – Бүлүүгэ, Горнайга уонна Алдан Томмотугар, ыам ыйын 27 күнүгэр – Үөһээ Бүлүүгэ уонна Кэбээйигэ.

Хотугу Муустаах байҕал кытылыгар сытар уонна Артика эргимтэтигэр киирэр улуустарга барыларыгар кэриэтэ оттук дьыла бэс ыйын саҥатыгар түмүктэнэр. Арай Усуйаанаҕа бэс ыйын 18 – 19, оттон Аллайыахаҕа – 23 күнүгэр арахсыаҕа. Булуҥ улууһугар оттук дьыла хаһан даҕаны түмүктэммэт, кииннэммит ититии сылы эргиччи холбонон турар.

Даҕатан эттэххэ, халаан уутуттан эмсэҕэлээбит Өлүөхүмэ, Нам улуустарыгар уонна да атын сирдэргэ олохтоохтор дьиэлэрин-уоттарын куурдуналларыгар ититиини кэлин араарыахтара.

Бэй.кэр.
Хаартыска: аһаҕас источниктан.   

Санааҕын суруй

Бүтэһик сонуннар