Ыам ыйын 21 күнүн киэһэтин туругунан, Нам улууһугар бары нэһилиэнньэлээх пууннарга уу таһыма түһэр. Быстах кэмҥэ олорор пууннарга барыта 460-тан тахса киһи баар.
Улуус баһылыга Юрий Слепцов иһитиннэрбитинэн, 14 нэһилиэккэ (16 бөһүөлэк) уу түһэр турар, ханна даҕаны муҥутуур кирбиини куоһарар сир суох. Ол гынан баран, Сыгынньахха, Бүтэй Үрдүгэй, Граф Биэрэгэр, Маймаҕаҕа, Хатырыкка уонна Модукка өссө да 237 дьиэ ууга турар. 204 дьиэ гааска, 46 абонент – уот ситимигэр холбоно илик.
“Быстах кэмҥэ олорор 9 пууҥҥа барыта 465 киһи киирэн олорор, 988 киһи аймахтарынан түспүт. Ону таһынан, 695 киһи уу ылбатах атын нэһилиэктэригэр барбыт. Эмсэҕэлээбит нэһилиэктэргэ төһө-хас наадатынан көрөн, гуманитарнай көмө барар, хамыыһыйа үлэлиир”, – диэн халаан мунньаҕын кэмигэр бырабыыталыстыба бэрэссэдээтэлин солбуйааччыта Дмитрий Садовников кэпсээтэ.
