Саахалтан, айылҕаҕа тахсар ыксаллаах быһыыттан-майгыттан эмсэҕэлээбит дьон үбүнэн-харчынан көмөнү Госуслуги портал нөҥүө ылыахтарын сөп.
Өрөспүүбүлүкэ бырабыыталыстыбатын бэрэссэдээтэлин солбуйааччыта Анатолий Семенов иһитиннэрбитинэн, бүгүҥҥү туругунан, биир кэмнээх матырыйаалынай көмөнү ыларга 155, оттон бас билэр баайы-дуолу сүтэрбитинэн сибээстээн, үбүнэн көмөнү көрдүүргэ 138 сайабылыанньа киирбит.
Ол курдук, Госуслуги порталга Саха өрөспүүбүлүкэтин түөрт судаарыстыбаннай өҥөтө баар буолбут:
1. Айылҕаҕа тахсар ыксаллаах быһыыттан-майгыттан эмсэҕэлээбит гражданнарга биир кэмнээх матырыйаалынай көмө;
2. Айылҕаҕа тахсар ыксаллаах быһыынан-майгынан сибээстээн, бас билэр баайдарын-дуолларын сүтэрбит гражданнарга үбүнэн көмө;
3. Айылҕаҕа тахсар ыксаллаах быһыы-майгы түмүгэр доруобуйалара эмсэҕэлээбит гражданнарга биир кэмнээх босуобуйа;
4. Айылҕаҕа тахсар ыксаллаах быһыы-майгы содулуттан суорума суолламмыт гражданнар дьиэ кэргэннэригэр көрүллэр биир кэмнээх босуобуйа.
Көмө уонна өҥө туһунан сиһилии https://www.gosuslugi.ru/mchs. мантан билсиэххэ сөп.
