Дьокуускай куорат маастар-былаанын быһыытынан, Сайсары күөл уонна Роман Дмитриев аатынан 202-с түөлбэ кытылларын тупсараллар. Бу күннэргэ үлэ-хамнас хайдах бара турарын мээр Евгений Григорьев көрдө-иһиттэ.
“Главстрой” тэрилтэ салайааччыта Алексей Варламов иһитиннэрбитинэн, “Өрөгөй” успуорт комплексын кэннинээҕи сири кэҥэтэр туһугар, кыһынын буор-кумах куппуттар. Онно “Өрөгөй” кэннинэн сатыы сылдьар дьон кытыла оҥоһуллуохтаах. Өрөмүөн үлэтин чэрчитинэн, күөл кытылын бөҕөргөппүттэр. Билигин успуорт былаһааккаларын, сатыы уонна бэлэсипиэттээх дьон сылдьар сирдэрин оҥороллор, дьоҕус архитектурнай тэриллэри (малые архитектурные формы) атыыласпыттар. Сайсарыны сэргэ Ийэ тулаһатын (искибиэрин) саҥардан эрэллэр.
“Өрөгөй” успуорт киинин таһынааҕы сири-уоту “Аҕия оҕолоругар” диэри оҥорон бүтэриэхтээхтэр. Оттон Сайсары күөл таһынааҕы үлэ-хамнас, уопсайынан, бу сылга түмүктэниэхтээх. Ол бүттэҕинэ, бэлисиэпиэттээх да, сатыы да күөлү эргийэ холкутук сылдьар кыахтаныахтаах. Сынньанар түһүлгэлэр, успуорт, оҕо былаһааккалара баар буолуохтаахтар.
Итини таһынан, Евгений Григорьев Р.М. Дмитриев аатынан 202-с түөлбэ кытылын, онно оҥоһуллуохтаах Б.Ф. Неустроев-Мандар Уус уруһуйдарынан муралы көрдө-иһиттэ.
“Азия оҕолорунан” да сибээстээн, национальнай бырайыактары олоххо да киллэрии чэрчитинэн, былааннаах үлэ бара турар. Ону таһынан, Дьокуускай куорат маастар-былаанын быһыытынан куораты тупсарыы үлэтэ эмиэ толору ыытыллар”, – диэн мээр Евгений Григорьев быһаарда.
Дьокуускай куорат уокуруктааҕы дьаһалтатын пресс-сулууспата.
