Барыллаан ааҕыынан, бу саас халаан уутун содулун ороскуотун 1,7 млрд солкуобайтан тахса диэн аахпыттар. Нам, Өлүөхүмэ уонна Ньурба улуустарыгар барыта 25 нэһилиэнньэлээх пуун эмсэҕэлээбит.
Ыам ыйын 28 күнүгэр бырабыыталыстыба бэрэссэдээтэлин солбуйааччыта Дмитрий Садовников салайан ыыппыт Суһал ыстаап чөлүгэр түһэрии туһунан мунньаҕар маннык хоромньуну иһитиннэрдилэр:
-
көлө уонна суол-иис хаһаайыстыбата – 600 мөл. солк. тахса;
-
энэргиэтикэ уонна дьиэ-уот хомунаалынай хаһаайыстыбата – 100 мөл. солк. тахса;
-
тутуу – 500 мөл. солк. тахса;
-
тыа хаһаайыстыбата – 144 мөл. солк.;
-
үөрэҕирии – 100 мөл. солк. тахса;
-
бырамыысыланнас – 7,5 мөл. солк.
Халаан кэмигэр барыта 857 дьиэ ууга барбыт. Нам, Өлүөхүмэ уонна Ньурба улуустарын 25 нэһилиэнньэлээх пуунугар 3497 киһи эмсэҕэлээбитин билинниллибит. Судаарыстыбаннай өҥө порталын нөҥүө матырыйаалынай уонна үбүнэн-аһынан көмө харчыны ыларга 5 тыһыынчаттан тахса сайабылыанньа киирбит. Ил Дархан Айсен Николаев сорудаҕынан, ыксаллаах быһыы-майгы содулуттан эмсэҕэлээбит дьоҥҥо көрүллэр төлөбүр суумата 2 – 4 төгүл индексацияламмыт.
Чөлүгэр түһэрэр үлэ салҕанар. Барыллаан ааҕыынан, Өлүөхүмэ улууһугар 11 элбэх кыбартыыралаах уонна 4 чааһынай дьиэ букатын суох буолбуттар (полностью утрачены), туһаттан тахсыбыттар. Ол дьиэлэр сылын аайы ууга бараллар эбитэ үһү. Бас билээччилэргэ РФ Тутууга министиэристибэтин ааҕар ньыматын учуоттаан, саҥа дьиэ-уот атыылаһалларыгар субсидия көрүллүөхтээх.
Санаттахха, ыам ыйын 20 күнүгэр халаан уутун уустук быһыытыттан-майгытыттан сылтаан, Саха сиригэр эрэгийиэн таһымнаах ыксаллаах быһыыны-майгыны биллэрбиттэрэ.
