Ыам ыйын 29 күнүгэр паром сыанатын ыараттылар. “Ыттан тириитин сүлбэттэр” дииллэр эрээри, боростуой дьон хармаана баҕас хапсыйар буолбут. Сорох-сорох баҕас тириитин эмиэ сүллэрэрэ кэллэ.
Ол курдук, мантан антах Дьокуускай – Аллараа Бэстээх хайысханан паромунан туоруур пассажирдар киһи иһин 500 солкуобайы(!) төлүүр буоллулар. Оттон былырыыҥҥа диэри сыана улахан киһиэхэ 200, оҕоҕо – 100 солк. этэ. Букатын икки төгүл ыараабыт. Хата, биэһигэр диэки саастаах оҕолору тыыппатахтар, босхо сылдьыахтара үһү. “Дьиҥэр, силигин ситэрэн, кинилэргэ эмиэ сыана олохтуох этилэр буоллаҕа” диэҕи баҕарыллар. Уопсайынан, дьон-сэргэ "сыана дьиикэйдик ыараабыт" диир.
Биллэн турар, паромщиктар хоруйдара биир: “Уматык, сапчаас, өрөмүөн үлэтин сыаната ыараата”, – диэн “Паромы Якутии” тэрилтэ салайааччыта Николай Ефимов СИА-ҕа хоруйдаабыт уонна катердар дьону инньэ 1000 солк. таһалларын санаппыт. Кинилэри эмиэ өйдүүбүт: оҕолоох-уруулаах, дьиэлээх-уоттаах дьон. Оччоҕуна итини ким хонтуруоллуохтааҕый? Суобас тойон дуу, Судаарыстыба хотун дуу?
Эбэн эттэххэ... Сыана бэлиитикэтин судаарыстыбаннай кэмитиэтэ пассажирдары тиэйии-таһыы сыанатыгар хайдах даҕаны орооһор кыаҕа суох үһү. Кини көлө, нууччалыы эттэххэ, тырааныспар эрэ сыанатыгар сатаан дьайар дииллэр. Итини эмиэ СИА чопчулуур.
