Арассыыйатааҕы Атыы-бырамыысыланнай палаатата олохтообут “Көмүс Меркурий” диэн дойду таһымнаах улахан наҕараада баар. Ол куонкурус түмүгүнэн урбаан эйгэтигэр сыһыаннаах интэриэһинэй бырайыактаахтарга ананар. Бириэмийэни туттарыы Федерация Сэбиэтин уонна Судаарыстыбаннай Дума өйөбүлүнэн ыытыллар.
Саха сиригэр тэриллэр эрэгийиэн таһымнаах түһүмэххэ быйыл Дьокуускай Мархатыгар баар племенной, о.э. талыы боруода сибиинньэни иитэр В.Ф. Кабохин аатынан “Сибиир” ПТ КХ “Бастыҥ дьоҕус тэрилтэ” ааты ылбыт. Манна даҕатан эттэххэ, эрэгийиэннээҕи түһүмэххэ бу тэрилтэ бэлиэр иккис сылын кыайыыта. Талыыны ааспыт кыттааччылар дойду таһымыгар өрөспүүбүлүкэ чиэһин көмүскүүллэр. Ол аата, быйыл олор ортолоругар “Сибиир” хаһаайыстыба киирэр буолбут.
Тэрээһин чэрчитинэн, тыа хаһаайыстыба сайдыытыгар сүҥкэн кылааттарын киллэрбит, бу хаһаайыстыба төрүттэниэҕиттэн үлэлиир, үлэлии сылдьыбыт үлэһиттэргэ “Урбааҥҥа үтүөлэрин иһин”, “Урбааны сайыннарыыга ураты кыттыы иһин” уонна “Үлэ бочуоттаах бэтэрээнэ” уопсастыбаннай наҕараадалары, кэккэ үлэһиттэргэ Бочуотунай грамоталары туттартаабыттар.
Санатар буоллахха, “Сибиир” хаһаайыстыбаны дьиэ кэргэн аҕа баһылыга Владимир Филиппович Кабохин 29 сыл анараа өттүгэр төрүттээбитэ. Бастаан түөрт ийэ сибиинньэни кытта биир атыыр сибиинньэни ииттэн саҕалаабытын кэпсиир буолара. Красноярскай кыраайтан төрүттээх, 1965 сыллаахха Каннааҕы политехническэй техникуму “теплоэнергетик” инженер идэтин бүтэрэн баһылаабыт, 20-тэн тахса сыл Дьокуускайдааҕы холбоһуктаах авиа-этэрээккэ үлэлээбит, 1990-с сылларга хочуолунай тэриллэри өрөмүөннүүрүнэн дьарыктана сылдьыбыт, ол эбэтэр, омос көрүүгэ тыа хаһаайыстыбатыттан лаппа ыраах киһи бааһынайдыыр суолу тутуспута туһунан бэлиэ көстүү. “Саха сиригэр сибиинньэ иитэр племенной хаһаайыстыба үөскүүр дьылҕата таайа сыттаҕа”, – диэххэ сөп. Биир бастакынан, суос-соҕотох племхаһаайыстыба буолары ситиһии үтүмэн сыранан ситиһилиннэҕэ.
Хас күһүн аайы ыытыллар быыстапкаҕа Владимир Кабохины өрүү бэйэтинэн кэлэн кыттарын, ситиһиилэнэрин үгүстэр урут көрөргүт буолуо. Кини, хомойуох иһин, 2021 сыллаахха соһумардык суох буолбута. Хаһаайыстыба билигин кини аатын чиэстээхтик сүгэр. Ону бу ситиһэр кыайыылара да кэрэһилииллэр. “Сибиири” билигин Денис Савостин салайар.
Былырыын хаһаайыстыба 500 т бастыҥ хаачыстыбалаах сибиинньэ этин оҥорон таһаарбыта. Быйыл саҥа табаарынай пиэрмэ тутуутун саҕалаан, үс-хас сылынан ийэ сибиинньэни 900 төбөҕө тиэрдэр, сылга 2520 т тиийэ эт бэлэмин улаатыннарар баһырхай былааннаахтарын СИА тохсунньуга таһааран турар. Утум салҕанар.
Ас-үөл өттүнэн көмүскэллээх буолуу олус наада кэмигэр, былаан-сорук туоллар ханнык.
Татьяна ЗАХАРОВА-ЛОҺУУРА.
