Бэс ыйын 3 күнүнээҕи туругунан, Саха сиригэр 11 улуус сиригэр барыта 19 ойуур баһаарын умуллара сылдьаллар. Ол туһунан СӨ Экологияҕа министиэристибэтэ иһитиннэрэр.
Уот барыта 20 тыһыынчаттан тахса гаа иэннээх сиргэ умайа турар. Быһыыр сулууспалар Алдаҥҥа, Бүлүүгэ, Үөһээ Дьааҥыга, Намҥа, Нерюнгрига, Ньурбаҕа, Сунтаарга, Томпоҕо, Өлүөхүмэҕэ, Уус Майдаҕа уонна Хаҥаласка үлэлииллэр.
Ойуур баһаарын умулларыыга 624 киһи уонна 39 тиэхиньикэ үлэлиир. 16 көтөр суудуна ойууру кэтиир-маныыр, биэс бөртөлүөт үлэһиттэри тиэйэр-таһар уонна уоту умулларар.
“Ойуур баһаарын утары ураты эрэсиим” диэн Алдаҥҥа, Аммаҕа, Бүлүүгэ, Үөһээ Дьааҥыга, Өлүөхүмэҕэ, Сунтаарга уонна Тааттаҕа биллэриллэн турар. Оттон Саха сиригэр ыам ыйын 6 күнүттэн “баһаар куттааллах дьыла” диэн олохтоммута.
