Саха сиригэр ойуур баһаардарын умуллараары уонна бохсоору сөмөлүөтүнэн ардаҕы түһэрэн эрэллэр. Бу күннээҕи туругунан, барыта үс зондировщик-сөмөлүөт үлэлии сылдьар.
Ил Дархан Айсен Николаев иһитиннэрбитинэн, “Полярные авиалиини” АХ Ан-26 “Атмосфера” салгын аала Мииринэйгэ, Ленскэйгэ, Сунтаарга, Ньурбаҕа уонна Өлүөхүмэҕэ үлэлээбит. Росгидромет Як-40 сөмөлүөтэ Амманан, Мэҥэ Хаҥалаһынан, Хаҥалаһынан, Алданынан уонна Томпонон сылдьыбыт. Кэккэ улуустарга ардах түһэрэ күүһүрбүт.
Ардаҕы түһэрэр сөмөлүөт дьуоттаах-үрүҥ көмүстээх пиро-ботуруон диэнинэн ытар. Суруйалларынан, экологияҕа туох да буортута, куттала суох. Сөмөлүөттэр былыты халлааҥҥа сир кырсыттан 5 – 7 килэмиэтир үрдүктээх сиргэ ыталлар.
Урут суруллубуту аҕыннахха, билигин “баһаары утары ураты эрэсиим” Алдан, Амма, Үөһээ Дьааҥы, Бүлүү, Өлөөн, Сунтаар, Таатта, Томпо улуустарыгар уонна Дьокуускай куоракка олохтонон турар. Өлүөхүмэ улууһун тыаларыгар ыксаллаах быһыы-майгы эрэсиимэ биллэриллибитэ.
Дьокуускай уонна кини тулатынааҕы бөһүөлэктэргэ, Мэҥэ Хаҥаласка, Хаҥаласка, Горнайга, Чурапчыга, Аммаҕа, Тааттаҕа, Уус Майдаҕа, Алдаҥҥа, Сунтаарга, Ньурбаҕа, Бүлүүгэ, Үөһээ Бүлүүгэ, Эдьигээҥҥэ, Үөһээ Дьааҥыга, Томпоҕо, Орто Халымаҕа, Муомаҕа, Кэбээйигэ уонна Өймөкөөн улууһугар уот барар төрдүс таһымнаах куттала үөскээн турар. Оттон Өлүөхүмэ улууһун соҕурууҥҥу өттүгэр олус кутталлаах V таһым биллэриллибитэ.
