Быйыл “Ситим” медиа-бөлөх көҕүлээһининэн Саха сиригэр Үс Хатыҥ ытык туонатыгар “Кымыс иһиитин саамай элбэх киһилээх сиэрэ-туома” Гиннес рекорда олохтоммута 10 сыла буолла (2014 – 2024). Оруобуна 10 сыл анараа өттүгэр тунах ыйын кэмигэр 11 136 киһи Кымыс Түһүлгэтигэр мустан, Айыыларга сүгүрүйэр сиэри-туому оҥорон, рекорд олохтообуппут. Бу ааспыт 10 сыл иһигэр кымыспыт Саха сирин олохтоохторун уонна төрүт астаах эрэстэрээннэрин менютугар дьоһун миэстэни булла.
Ол бэлиэ түгэни көрсө, 2024 с. бэс ыйын 27 күнүгэр (чэппиэр) сарсыарда 10:00 чаастан Хаҥалас улууһун Өктөм сэлиэнньэтигэр М.П. Лиханов хаһаайыстыбатын дьиэтигэр-уотугар “СӨ Кымыһы оҥорон таһаарыыны сөргүтүүгэ, харыстааһыҥҥа уонна сайыннарыыга анаммыт миэрэлэр тустарынан” кымыс хайдах оҥоһулларын илэ хараҕынан көрүүлээх, билсиилээх төгүрүк остуол тэриллэр.
Күн бырагыраамата:
- Төгүрүк остуол;
- М.П. Лиханов хаһаайыстыбатын холобуругар кымыһы оҥоруу технологиятын көрдөрүү;
- Кымыс амсайыылаах фуршет.
Кытталлар:
- СӨ Ил Түмэнэ;
- СӨ Бырабыыталыстыбата;
- СӨ Тыа хаһаайыстыбатыгар министиэристибэтэ;
- СӨ Доруобуйа харыстабылыгар министиэристибэтэ;
- СӨ Үөрэххэ уонна билимҥэ министиэристибэтэ;
- СӨ Урбааҥҥа, эргиэҥҥэ уонна туризмҥа министиэристибэтэ;
- СӨ Аһылыкка технологиятан өрөспүүбүлүкэтээҕи киинэ;
- “Туймаада” агрохолдинг;
- Кымыһынан дьарыктанар тыа хаһаайыстыбатын оҥорон таһаарааччылара;
- Хаҥалас улууһун дьаһалтата;
- СМИ үлэһиттэрэ.
- 35 сирэй кыттааччы уонна ВКС нөҥүө холбонооччулар баар буолуохтара.
