САХА СИРИГЭР УМАЙА ТУРАР ОЙУУР АХСААНА КҮН-ТҮҮН ЭБИЛЛЭН ИҺЭР
Уоту бохсор сулууспалар ааспыт суукка иһигэр Алдаҥҥа, Булуҥҥа, Эдьигээҥҥэ, Кэбээйигэ, Мэҥэ Хаҥаласка, Мииринэйгэ, Намҥа, Нерюнгрига, Томпоҕо уонна Уус Майдаҕа 20 баһаары умулларбыттар. Ол туһунан бэс ыйын 18 күнүнээҕи мунньахха экология миниистирин солбуйааччы Андрей Коноплев кэпсээтэ.
“Ааспыт күннээх түүн иһигэр барыта 14 466 гаа иэннээх 20 баһаары умуллардылар, 542 гаа иэннээх уоту хааччахтаатылар. Бэс ыйын 18 күнүнээҕи туругунан, Саха сиригэр 21 муниципальнай тэриллии территориятыгар барыта 158 948 гаа иэннээх 93 ойуур баһаара баар”, – диэн миниистир солбуйааччыта тиһэх сонуннары билиһиннэрдэ.
Уоту бохсуута 724 киһи уонна 37 араас уйуктаах, кыахтаах тиэхиньикэ үлэлиир. Биир да уот нэһилиэнньэлээх пууннарга уонна экэниэмикэ эбийиэктэригэр суоһаабат.
Санаттахха, бэҕэһээ, ол эбэтэр бэс ыйын 17 күнүгэр, Саха сиригэр уопсайа 121,9 тыһыынча гаа иэннээх 74 баһаар баара. Ол аата, суукка иһигэр 19 сиргэ эбии уот турбут.
Бэй.кэр.
Хаартыска: РФ Оборуонаҕа министиэристибэтин пресс-сулууспата/ТАСС.
