Бэс ыйын 18 күнүгэр дойду бэрэсидьиэнэ Владимир Путин Саха сиригэр кэлэн барда. Кини Дьокуускайга аҕыс чаас кэриҥэ сырытта эрээри, ити кэм иһигэр Өрөспүүбүлүкэ уонна Уһук Илин бүттүүн сайдыытын боппуруостарын дьүүллэстэ, “Үлэ квартала” креативнай кластерга ыалдьыттаата, дойду көмүскэлигэр оҥоһуллар сэби-сэбиргэли, аныгы технологияны билистэ, каадырынан хааччыйыы бырагырааматын кыттыылаахтарын кытта көрүстэ, “Туймаада” стадион таһыгар бар дьоннуун дорооболосто, Муусука үрдүкү оскуолатыгар баран кэллэ уонна Ил Дарханныын кэпсэттэ. Олортон сүрүн суолларга тохтоотоххо...
Владмир Путин Айсен Николаевтыын көрсүһүүтүгэр Саха сиригэр демография балаһыанньатын хайҕаата, дойду орто таһымыттан үрдүк көрдөрүүлээхпитин бэлиэтээтэ. Икки салайааччы көрсүһүү кэмигэр өрөспүүбүлүкэ социальнай-экэнэмиичэскэй сайдыытыгар уонна көрдөрүүлэригэр тохтоотулар – креативнай экэниэмикэттэн, Дьокуускай агломерациятын маастар-былааныттан, хаарбах дьиэ боппуруоһуттан саҕалаан Өлүөнэ күргэтин тутууга тиийэ. Бэрэсидьиэн “тэтимҥитин ыһыктымаҥ” диэтэ.
“Үлэ кварталыгар” Ил Дархан Айсен Николаев уонна бырабыыталыстыба бэрэссэдээтэлин солбуйааччы Анатолий Семенов Владимир Путиҥҥа Саха сирин ИТ эйгэҕэ ситиһиилэрин сырдаттылар. Ол иһигэр анал байыаннай дьайыыга туттуллар бырамыысыланнай бородууксуйаны, “Сайберия” диэн мэдиссиинэҕэ туттулар оҥоһуу өйү, о.д.а. көрдөрдүлэр.
Владимир Путин “Земскэй быраас”, “Земскэй учуутал”, “Муравьев-Амурскай” бырагыраамаларынан көһөн кэлбит эдэр исписэлиистэри кытта көрсүүтүгэр эдэр дьон Уһук Илиҥҥэ көһөн кэлэрэ элбээбитин уонна онтон астынарын, биһириирин эттэ. Онно даҕата бэрэсидьиэн “Хотугу надбавкаттан” НДФЛ тутуллубат буоларыгар этии киллэрдэ.
Бэрэсидьиэн өтөр “Азия оҕолоро” ыытыллыахтаах киин түһүлгэтин – “Туймаада” стадиону – эмиэ көрдө. Ол таһыгар, уулуссаҕа, дьон-сэргэ турарыгар тиийэн дорооболосто, бар дьоннуун илии тутуста. Ити кэннэ Покровскайдыыр суолга турар Муусука үрдүкү оскуолатыгар сылдьан уһуйааччылар уонна мусукааннар Арассыыйа уонна Саха сирин култууратыгар киллэрэр кылааттарын иһин махтанна, эҕэрдэ нүөмэрдэри көрдө. Ону таһынан, Муусука үрдүкү оскуолатын тутуу иккис түһүмэҕэр көмөлөһүөх буолла. Тутуу 2026 с. түмүктэниэхтээх. Оскуола үөрэнээччилэрэ бэрэсидьиэҥҥэ бэйэтин мэтириэтин уруһуйдаан бэлэх туттардылар.
Дойду бэрэсидьиэнэ икки сөмөлүөт арылдьыттаах киэһэ аҕыс чаас саҕана Дьокуускайтан көтөн барда. Бу күннэргэ кини Ким Чен Ын салайааччылаах Хотугу Кэриэйэҕэ ыалдьыттыыр.
