Бэс ыйын 25 күнүгэр Ил Дархан Айсен Николаев “Азия оҕолоругар” кыттыахтаах Саха сирин сүүмэрдэммит хамаандатын кытта көрүстэ, үтүө алгыс тылын анаата.
Быйылгы оонньууларга Саха сириттэн барыта 370 спортсменнаах икки хамаанда кыттыахтаах: бастакы – 245, иккис – 125 кыттааччылаах. Ону таһынан, хамаандаҕа 121 тириэньэр уонна атын исписэлиис, успуорт көрүҥнэринэн 45 бэрэстэбиитэл уонна салайааччы бааллар. Бастакы хамаанда 24 көрүҥҥэ кыттар буоллаҕына, иккис – 21.
“Сарсын “Туймаада” стадиоҥҥа “Азия оҕолоро” оонньуу уота умайыаҕа. Бу күнү өр күүттүбүт. Элбэх омугу сомоҕолуур Саха сирэ эһигиттэн, өрөспүүбүлүкэбит аатын-суолун көмүскүүр сүүмэрдэммит хамаанда кыттыылаахтарыттан, элбэҕи күүтэбит, эрэнэбит. Эһиги бу күҥҥэ диэри улуустартан уонна куораттартан уһун суолу айаннаан кэллигит, эһиэхэ сүктэриллэр эппиэтинэһи толору өйдүүгүт. Эһиги Азия кэнтиниэтин бастыҥтан-бастыҥ спорстменнарын кытта күрэстэһиэххит. Ол түмүгэр үүнүөххүт, таһымҥыт үрдүөҕэ. “Азия оҕолоро” оонньуу манна турар үгүс ыччакка кэнтиниэн, аан дойду чөмпүйэнээттэрин уонна Олимпиада оонньуларын аанын арыйыа диэн эрэнэбин. Ситиһиилээх саҕалааһыны, дьоһуннаах утарсааччылары, үрдүктэн үрдүк ситиһиилэри!” – диэн Ил Дархан алгыс тылын эттэ.
