Бэс ыйын 26 күнүттэн саҕалаан Дьокуускайга уонна киин улуустарга халлаан тэмпэрэтиирэтэ сыыйа сөрүүкээн барыаҕа. Халлааммыт кэлэр нэдиэлэттэн эрэ кыралаан сылыйыаҕа. Ол туһунан СИА-ҕа Гидромет-киин салайааччыта Татьяна Маршалик кэпсээбит.
“Бүгүн бу нэдиэлэҕэ өрөспүүбүлүкэ киин улуустарыгар бүтэһик итии күн буолуоҕа. 26 чыыһылаттан саҕалаан халлаан сөрүүкүө, быһа холоон, +25 кыраадыс курдук буолуо. Күнүһүн кыралаан ардыаҕа, былыттаах буолуоҕа. Ити кэннэ кэлэр күннэргэ күнүскү өттүгэр +15...+20 буолара күүтүллэр. Онон, Туймаада ыһыаҕын кэмигэр биллэ сөрүүкүө”, – диэн Татьяна Маршалик кэпсиир.
Эспиэр этэринэн, ити сөрүүн салгын Хотугу Муустаах байҕал диэкиттэн кэлбит.
“Тымныы салгын балаһата Дьааҥы хайаларын туораан, илин эҥээр улуустарынан Лаамы байҕалыгар тиийиэҕэ. Ол киин улуустары эмиэ хабыаҕа. Кэлэр нэдиэлэттэн халлаан кыралаан сылыйан, +28 кыраадыска тиийиэҕэ”, – диир Т.Маршалик.
Бэс ыйын 26 күнүгэр Уус Алдаҥҥа, Тааттаҕа, Чурапчыга, Уус Майдаҕа, Алдаҥҥа, Нерюнгрига, Томпоҕо, Өймөкөөҥҥө, Муомаҕа уонна Үөһээ Халымаҕа сөкүүндэҕэ 15 – 20 миэтэрэ түргэннээх тыаллаах этиҥнээх дохсун ардахтар түһүөхтэрэ. Эдьигээҥҥэ, Кэбээйигэ, Үөһээ Дьааҥыга, Томпоҕо уонна Өймөкөөҥҥө ардыаҕа, сорох сиринэн бэрт күүскэ түһүө.
Бүгүн күнүс Дьокуускайга эмиэ кыралаан ардыаҕа, +24 кыраадыс сылаас буолуоҕа.
Халлаан биллэ сөрүүкүүрүнэн сибээстээн, Туймаада ыһыаҕар хойукка диэри сылдьааччылар уонна хонооччулар сэрэххэ сонноох барбыккыт ордук буолуоҕа.
