Куйаар ситиминэн соторутааҕыта Нерюнгритааҕы көтөр фабрикатыгар сальмонелла көстөн, тэрилтэ суутунан 150 тыһ. солкуобайга ыстарааптаммытын туһунан иһитиннэрии тарҕаммыта. Ол гынан баран, ити “сонун” олоҕо суоҕа, инньэ тохсунньу ыйга тахса сылдьыбыт түбэлтэҕэ сыһыаннааҕа билиннэ. Тэрилтэ онтугар ыам ыйыгар кэлэн биирдэ ыстарааптаммыт. Онон хойутаабыт миэрэ бутууру таһаарбыта илэ.
Көтөр фабрикатыгар билиҥҥи баар быһыыны-майгыны Нерюнгри оройуонунааҕы тургутан көрөр, бэрэбиэркэлиир лабораториялаах бэтэринээрийэ управлениетыттан кэмэнтээрийдээбиттэрин “V Якутии.ру” интэриниэт-хаһыат таһаарбыт.
Ол курдук, лаборатория дириэктэрэ Маргарита Клименко иһитиннэрбитинэн, производственнай хонтуруол бигэргэммит сыллааҕы былаан-кыраапыгынан Нерюнгритааҕы көтөр фабрикатын бородууксуйата көтөрдөрү эккэ өлөрөн астааһын хас биирдии даататыттан лаборатория анаалыһын ааһара кытаанахтык тутуһуллар, лаборатория чинчийиитин түмүктэрэ фабрика бородууксуйата санитария нуормаларыгар сөп түбэһэрин, ыарыыны көбүтэр микроорганизмнар, ол иһигэр сальмонелла суохтарын бигэргэтэллэр.
“Сыахтар, бройлер-чоппууска үөскэҕин, баттана сытар сымыыт, патогеннай матырыйаал, көтөр иһин-үөһүн, сааҕын, түүтүн санитарнай туруктарын ый ахсын чинчийэбит. Ону тэҥэ сыахтар истэригэр салгыҥҥа патогеннай организмнар баалларын эбэтэр суохтарын хонтуруоллуубут. Көтөрү эккэ туттуу кэнниттэн астаммыт эт бородууксуйа, полуфабрикат уонна суббородуукта барыта бэрэбиэркэлэнэр. Куурусса сымыыта ыйга иккитэ иҥэмтиэлээх бэссэстибэлэргэ (каротиноидтар – А бөлөх битэмииннэрэ) уонна патогеннарга чинчийиини ааһар. Нерюнгритааҕы көтөр фабрикатыгар 2024 сыл бастакы аҥаарыгар патогеннай микроорганизмар, ол иһигэр сальмонелла, көстүбэтилэр”, – диир лаборатория дириэктэрэ.
Россельхознадзор Амур уобалаһыгар уонна Саха Өрөспүүбүлүкэтигэр салалтатын (управлениетын) 2024 сыл бэс ыйын 24 күнүнээҕи дааннайынан, Дьокуускайдааҕы өрөспүүбүлүкэ бэтэринээрийэҕэ лабораториятын, Россельхознадзор Амурдааҕы референтнэй киинин уонна Нерюнгритааҕы бэтэринээрийэ управлениетын тургутан көрөр, бэрэбиэркэлиир лабораториялара Нерюнгритааҕы көтөр фабрикатын бородууксуйатыгар сальмонелланы булбатылар.
Россельхознадзор Амур уобалаһыгар уонна Саха Өрөспүүбүлүкэтигэр салалтата быйыл олунньуга Нерюнгритааҕы көтөр фабрикатыгар былааны таһынан бэрэбиэркэни ыыппыта. Бэрэбиэркэ чэрчитинэн эт бородууксуйаттан уонна сымыыттан “Россельхознадзор Амурдааҕы референтнэй киинэ” ФСБТ тургутан көрөр,бэрэбиэркэлиир лабораториятыгар чинчийэргэ анаан эттиктэри ылбыттара. Чинчийии боротокуолугар олоҕуран суруйдахха, бородууксуйаҕа сальмонелла суоҕа өссө төгүл бигэргэннэ.
Елена СОКОЛОВА.
Хаартыска: интэриниэт аһаҕас ситимиттэн.
