Бэс ыйын 29 уонна 30 күннэригэр Дьокуускай Үс Хатыҥар Туймаада ыһыаҕа ньиргийэн ааста. Икки күн тура тэбинэн өрөспүүбүлүкэ саамай киэҥ далааһыннаах ыһыаҕар барыта 230 тыһыынчаттан тахса киһи сырытта.
Биллэрин курдук, Туймаада ыһыаҕа Арассыыйа саамай улахан национальнай бырааһынньыга. Ыһыах үөрүүлээх арыллыытын кэмигэр, алгыс түһэр дьоро түгэнигэр, Кымыс киинин түһүлгэтигэр хас эмэ уонунан тыһыынча киһи мустан, түрүбүүнэҕэ биир даҕаны кураанах миэстэ хаалбата. “Азия оҕолоро” норуоттар икки ардыларынааҕы оонньууга кытта-көрө кэлбит дьон бочуоттаах ыалдьыт быһыытынан сырыттылар.
“Дыгын оонньуулара” быйыл ыһыах киин түһүлгэтигэр ыытыллан, урукку сылларга холооно суох элбэх киһи көрдө. Иккис күнүгэр Ил Дархан бирииһигэр ыытыллыбыт ат сүүрдүүтүн эмиэ аҕыйаҕа суох киһи көрдө.
Уопсайынан, быйыл Туймаада ыһыаҕын кэмигэр 114 араас тэрээһин, күрэхтэһии буолла.
Дьокуускай куорат дьаһалтатын пресс-сулууспата.
