“Национальнай бэчээт күнэ 2020 сыллаахха Ил Дархан Айсен Николаев ыйааҕынан, 1907 сыллаахха аан бастакы сахалыы тыллаах хаһыат тахсыбыт күнүн даҕата, олохтоммута. Ону барытын Василий Никифоров-Күлүмнүүр көҕүлээбитэ. Онтон бэттэх бу үйэттэн ордук кэм устатыгар сахалыы тыллаах хаһыат тиһигин быспакка тахса, бэчээттэнэ турар. Оттон ол төрөөбүт тылы харыстыырга уонна сайыннарарга улахан суолталаах. Бу бырааһынньыкка сыһыаннаах дьону барыгытын истиҥник эҕэрдэлиибин, инникитин саҥа сахалыы таһаарыылар баар буолан иһиэхтэрэ диэн эрэнэбин”, – диэн СӨ бырабыыталыстыбатын бэрэссэдээтэлин солбуйааччыта Анатолий Семенов киирии тылыгар эттэ.
“Бу бырааһынньык өрөспүүбүлүкэ судаарыстыбаннай уонна официальнай тылларын сайыннарар уонна харыстыыр, сахалыы бэчээт эйгэтигэр үлэлии-хамсыыы сылдьар дьон аатын-суолун үрдэтэр соруктаах. Саха суруналыыстыката күн баччатыгар диэри дьоһуннаах суолунан хардыылаан кэллэ, кини гражданскай уопсастыба быстыбат сорҕото буолла. Оттон бүгүн кырдьык уонна бу олорор кэммит туһунан кырдьыктаах санаа хаһааҥҥытааҕар даҕаны наада”, – диэтэ Александр Подголов.