От ыйын 2 күнүгэр ойуур баһаардарын утары охсуһар Ыксаллаах быһыы-майгы хамыыһыйатын мунньаҕар Ил Дархан Айсен Николаев иһитиннэрбитинэн, өрөспүүбүлүкэ көрдөһүүтүнэн Москуба куоракка дойду бырабыыталыстыбата Саха сиригэр федеральнай таһымнаах ыксаллаах быһыыны-майгыны биллэрэр туһунан быһаарыыны ылыммыт. Ити барыта ойуур уотун утары көдьүүстээхтик охсуһарга көмөлөһүөхтээх.
От ыйын 2 күнүнээҕи туругунан, Саха сиригэр барыта 331 тыһыынча гаа иэннээх 107 сиргэ ойуур умайа турар. Уоту босхууга 1,5 тыһыынча кэриҥэ киһи, 100 араас уйуктаах, кыахтаах тиэхиньикэ үлэлии сылдьар. Ол иһигэр Арассыыйа Ыксаллаах быһыыга-майгыга министиэристибэтин авицията баар.
“Өлүөхүмэҕэ уонна Уус Майдаҕа балаһыанньа уустугуран турар. Онно ойуур баһаарын утары охсуһар сулууспалар эбии бардылар. Кэмигэр сөптөөх быһаарыылар ылыныллыбыттарын уонна уоту утары охсуһааччылар сатабыллаах үлэлэрин түмүгэр, бу күннэргэ баһаар ахсаана биллэ аҕыйаата. Үлэ салҕанар”, – диэн Ил Дархан эттэ.
Бэй.кэр.
Хаартыска: Ivan Nikiforov/Anadolu Agency via Getty Images
