ИТИННИК ЫЙЫТЫЫГА АЙСЕН НИКОЛАЕВ “РОССИЯ 24” ХАНААЛГА ХОРУЙДААТА
Саха сиригэр буолар баһаар 95%-на айылҕа араас көстүүлэриттэн сылтаан умайар. Күн бүгүн уоту бохсууга 1,5 тыһыынча кэриҥэ киһи үлэлии сылдьар. Онтон 600 киһитэ “Авиалесоохрана” тэрилтэ дойду араас эрэгийиэннэринээҕи салааларыттан кэлэнэ үлэлии сылдьаллар. Ити туһунан Ил Дархан “Россия 24” ханаал эфиригэр кэпсээтэ.
Саха сиригэр баһаар балаһыанньата бэрт тыҥааһыннаах. От ыйын 2 күнүнээҕи туругунан, өрөспүүбүлүкэҕэ барыта 305 тыһыынча гаа иэннээх 105 сиргэ ойуур умайа турар. От ыйын 1 күнүгэр дойду бырабыыталыстыбатын хамыыһыйатын быһаарыытынан, Саха сиригэр федеральнай таһымнаах ыксаллаах быһыы-майгы биллэриллибитэ.
“Ааспыт үс күн иһигэр баһаар ахсаанын биллэ аҕыйаттыбыт. Бэс ыйын 28 күнүгэр 180 баара. Ити барыта “Авиалесоохрана” тэрилтэ, бары баһаарынай холбоһуктар, эрдээхтик үлэлии-хамсыы сылдьар бар дьон көмөтүнэн ситиһилиннэ. Баһаар 350 тыһыынча гаа иэннээх сири сиэтэ, онтон 116 тыһыынча кэриҥэ гаатын хааччахтаатыбыт. Саамай улахан уот Томпо улууһугар турбута, ол 112 тыһыынча гаалаах сиринэн хааччахтанна.Быйыл баһаар 95%-на айылҕа дьайыытын түмүгэр турда, ону биһиги хайыыр даҕаны кыахпыт суох. Киһи дьайыытын түмүгэр буолар баһаардар эмиэ бааллар. Холобур, бэс ыйын 28 күнүгэр Өлүөхүмэҕэ турбут уонна ол күн умулларыллыбыт уот ситэ умуллубатах кулуһунтан сылтаан барбыта. Төһө да тайҕа киэҥ буоллар, баһаары ким ыыппыта, ким хаһан, ханна сылдьыбыта быһаарыллар. Быраабыланы кэһээччилэр миэрэҕэ тардыллаллар”, – диэн Айсен Николаев кэпсээбит.
Итини таһынан, Ил Дархан Саха сиригэр баһаартан сэрэхтээх буолуу ураты эрэсиимэ биллэриллэн турарын, ойуурга тахсар көҥүллэммэтин санаппыт. Быраабыла-бэрээдэк тутуһуллуутун МЧС үлэһиттэрэ уонна ботурууллуур биригээдэлэр кэтииллэр.
Бэй.кэр.
Хаартыска: Андрей Сорокин / СИА.
