От ыйын 10 күнүгэр Ил Дархан Айсен Николаев үөрүүлээх быһыыга “Азия оҕолоро” норуоттар икки ардыларынааҕы оонньуулар кыайыылаахтарын уонна призердарын кытта көрүстэ. Миэстэлэспит оҕолорго харчы сэртэпикээттэрин туттарда.
Ол курдук, көрүҥнэринэн бастаабыт оҕолор 50-нуу тыһыынча, иккис буолбуттар – 30-туу тыһыынча, үһүстэр – 20-лии тыһыынча солкуобайы тутан үөрдүлэр-көттүлэр.
“Биһиги чөмпүйүөннэрбит, призердарбыт, тириэньэрдэрбит, эһигини “Азия оҕолоро” оонньуулар түмүктэммиттэринэн, сүүмэрдэммит хамаандаларбыт оонньууларга чаҕылхайдык кыттыбыттарынан истиҥник эҕэрдэлиибин. Бу уон биир күн устата Дьокуускайга успуорт, дьиҥнээх доҕордоһуу, кырдьыктаах успуорт күрэҕин бырааһынньыга буолла. Оонньуулар олус үрдүк таһымнаахтык аастылар”, – диэн Айсен Николаев эҕэрдэлээтэ, өрөспүүбүлүкэ кинилэринэн киэн туттарын эттэ.
Ону сэргэ Ил Дархан бу курдук үтүө спортсменнары иитэн таһаарбыттарын иһин, бары тириэньэрдэргэ истиҥник махтанна.
Санаттахха, “Азия оҕолоро” оонньууга 24 дойдуттан уонна Арассыыйа федеральнай уокуруктарыттан барыта 1934 спортсмен кыттыбыта. Саха сирин сүүмэрдэммит хамаандатын кыттыылаахтара барыта 100-тэн тахса араас мэтээли ылбыттара.
