Интэриниэт ситимигэр Өлүөхүмэ Тээнэтин олохтоохторун суруга тарҕанна. Сурук ис хоһооно маннык:
“Биһиги, Өлүөхүмэ Тээнэтин олохтоохторо, уоту кытта охсуспуппут ый кэриҥэ буолла. Ордук кырдьаҕас дьон буруонан тыынарыгар олус ыарахан. Уот дэриэбинэ икки өттүгэр турда. Нэһилиэк олохтоохторо уонна баһылык уоту биир өттүттэн тохтотууга күнүстэри-түүннэри үлэлииллэр. Дьахталлар аһынан-үөлүнэн көмөлөһөллөр. Маннык быһыы-майгы ыйы быһа салҕанар. Көмөҕө икки эрэ инструкторы ыыппыттара, онон бүттэ! Күүс-уох эстэрэ кэллэ! Салгыы маннык быһыы-майгы салҕанара сатаммат! Көмө наада!”
Туһааннаах иһитиннэриигэ СӨ Экологияҕа министиэристибэтигэр маннык хоруйу биэрдилэр:
“Ойуур баһаара нэһилиэнньэлээх пуунтан 7 км сиргэ турар, уот нэһилиэккэ киирэр куттала суоһаабат. Манна уоту умуруорууга 14 киһи уонна анал техника үлэлиир. Халлаан туруга көннөҕүнэ Бе-200 үлэлиэҕэ. Билиҥҥи туругунан, эбии күүһү хамсатыыга халлаан туруга мэһэйдиир”.
Ону тэҥэ от ыйын 15 күнүгэр улуус баһылыга Николай Харбин телеграм-ханаалыгар маннык суруйбут:
“Ордук ыарахан балаһыанньа Тээнэ национальнай нэһилиэгэр турар.
Үгүс үлэ соҕуруулуу-илиҥҥи баһаары бохсууга ыытыллар, үлэ төгүрүк суукканы быһа тохтообот. Ол эрээри хоту өттүттэн өссө биир баһаар турбута, балаһыанньаны өссө ыаратта. Бу баһаар нэһилиэнньэлээх пууҥҥа чугаһыа суоҕун наада.
Онон бүгүн баһаары умуруорууга эппэтинэстээх дьону Тээнэҕэ ыытаары мустубут.
Бүгүн Заречнайтан Чараҕа диэри тиийиэхтэрэ, онтон Токко өрүс төрдүгэр мотуорунан айанныахтара. Салгыы нэһилиэнньэлээх пуун хоту өттүттэн уоту тохтотордуу Тээнэ бөһүөлэгэр водометунан тиийиэхтэрэ.
Маны таһынан өссө 8 киһини бэлэмнээтибит. Көлө боппуруоһа быһаарылыннаҕына, Тээнэҕэ авиалесохрана дьоно эбиллиэхтэрэ.
Хомойуох иһин, хойуу буруоттан сылтаан бөртөлүөтүнэн дьону тиэрдэр кыаллыбат. Ол эрээри аэромобильнай бөлөх дьоно уонна борт бэлэм тураллар. Халлаан туруга көҥүллээтэ да, Тээнэ баһаарыгар барыахтара.
Сарсын Ан-26 “Атмосфера” зондировщик-сөмөлүөт көтөрө күүтүллэр”.
Ол эбэтэр, бэҕэһээ соцситимнэргэ күүскэ тарҕаммыт сурук билиҥҥитэ олоҕо суоҕа билиннэ. Баһаары умуруорууга тустаах үлэ ыытыллар, уот хонтуруолга тутуллар, Тээнэ нэһилиэгэр тустаах көмө тиийиэхтээх.
Бэй.кэр.
