Саха сирин үрдүнэн 990 миэстэлээх саамай улахан оскуола тутуута сыл бүтүүтүгэр түмүктэниэхтээх, онтон кэлэр сыл балаҕан ыйын 1 күнүттэн кылаастарга оҕону ылыы саҕаланыахтаах. Бу иннинэ куорат “Прометей” түөлбэтигэр турар оскуола саамай улаханынан ааҕыллара.
Дьокуускай 153 кыбартаалыгар (ДСК оройуона) оскуоланы тутуу күүстээх үлэтэ ыытыллар. Генеральнай бэдэрээтчит этэринэн, тутуу матырыйаалын кэмигэр атыыласпыттар, араас үлэ биир кэмҥэ тэҥҥэ оҥоһуллубут уонна кытаанахтык хонтуруолламмыт, инбэнтээр атыылаһыллыбыт.
Бу кыбаартал куорат тэтимнээхтик сайдар сирдэриттэн биирдэстэрэ, манна 17-с түөлбэ уонна хоту улуустар олохтоохторо көһөрүллэр “Звездный” түөлбэлэрэ тутуллар.
Оскуола хайдах буолуоҕай?
Саҥа оскуола 990 үөрэнээччигэ, о.э. 30 үөрэнээччилээх 33 кылааска суоттанан тутуллар. Үөрэх эйгэтин үлэһиттэрэ бэлиэтииллэринэн, оскуолаҕа мантан элбэх оҕо үөрэнэрэ буолуо. Онон кылаастар улаатан биэриэхтэрэ.
Оскуола дьиэтэ Н-быһыылаах, киэҥ тиэргэннээх уонна начаалынай кылаастарга туспа блоктаах буолуоҕа. Онтон киин ааҥҥа инбэлииттэргэ уонна нэһилиэнньэ кыайан хаампат араҥатыгар анаммыт пандустаах буолуоҕа.
Тутуу уопсай иэнэ 8.391,08 кв. м., үс отсектаах: 1. Начаалынай кылаастар; 2. Бибилэтиэкэ; 3. Оскуола салалтата уонна үлэһиттэр үлэлиир хосторо. Иккис отсекка 5–11-с кылаастар үөрэнэр хосторо, үһүскэ вестибюль, 500 киһи аһыыр остолобуойа уонна ас астыыр сир, мэдиссиинэ көмөтүн хосторо, аактабай, успуорт саалалар, омук тылын кэбиниэттэрэ, хореография уонна драмкуруһуоктара дьарыктанар хосторо, сервернэй, санузел, тэхиниичэскэй хостор киириэхтэрэ.
Оскуола тиэргэнигэр успуорт уонна оонньуур былаһааккалар, газон, күөх үүнээйи баар буолуо.
Источник: сетевое издание Yakutia24/Якутия24
Фото: Андрей ШИЛОВ
