Владимир Егоров: “Саха сирин Үүнэр көлүөнэ пуондатын кэлэктиибин уонна тус бэйэм ааппыттан Алмаас хостооччу күнүнэн эҕэрдэлиибин!”
Бу бэлиэ күҥҥэ эрэллээх доҕорбутугар, партнербутугар Саха сиригэр оҕо аймах, ыччат дьон сайдыытыгар сүҥкэн кылааты киллэрэрин иһин махтал тылларын этиэхпитин баҕарабыт.
АЛРОСА хампаанньаны кытта уһун кэмнээх ыкса үлэ түмүгэр үүнэр көлүөнэбит инники сайдыытыгар киэҥ хабааннаах үлэ ыытыллар. Ол курдук, өр кэмнээх бииргэ үлэлэһии түмүгэр биһиги 30-тан тахса култуура эбийиэктэрин, оҕо уонна успуорт былаһааккаларын туттубут уонна өрөмүөннээтибит. Ону тэҥэ сүүстэн тахса араас хайысхалаах аахсыйаны уонна тэрээһиннэри ыыттыбыт.
АЛРОСА үбүнэн өйөөн, ону тэҥэ Пуонда үлэтин-хамнаһын саҥа кэнсиэпсийэтин быһыытынан 2021–2025 сс. “Инники кэскил туһугар” целевой бырагыраама үлэлиир.
Бу бырагыраама үүнэр көлүөнэ күүһүн-кыаҕын арыйарга уонна ыччат дьон билиитин-көрүүтүн, талаанын толору туһанарыгар, сайдарыгар сөптөөх усулуобуйаны тэрийэргэ көмөлөһөр.
Иккис сылын ыытыллар “Сайын” өрөспүүбүлүкэтээҕи бэстибээлгэ целевой бырагыраама сүрүн бырайыактара киирэллэр. Тэрээһин Оҕо көмүскэлин күнүгэр ыытыллар уонна икки тыһыынчаттан тахса оҕоҕо уонна төрөппүккэ СӨ Талааннаах оҕолорун таһаарар уонна өйүүр Эрэгийиэннээҕи киин үлэтин-хамнаһын түөрт хайысхатын – билим, успуорт, креатив уонна ускуустуба туһунан билиһиннэрэр.
Эрэгийиэннээҕи киини таһынан атын кыра бырагыраамалар эмиэ ситиһиилээхтик үлэлииллэр, холобур “Оҕо саас лабаратыарыйата”, “Оскуола саастаах оҕо сайдыытыгар усулуобуйа тэрийии”, “Ыччат: өйөбүл уонна сайдыы” уонна “Аныгы ирдэбилгэ эппиэттиир уопсастыбаннай сири-уоту тэрийиигэ көмөлөһүү”.
“Ыччат: өйөбүл уонна сайдыы” бырагыраама чэрчитинэн Үүнэр көлүөнэ паарката тутуллар уонна кэмиэрчэскэйэ суох тэрилтэ бырайыактара олоххо киирэллэр.
“Үүнэр көлүөнэ паарката АНО араас тэрээһиннэри ыытар, креативнай индустрия бэрэстэбиитэллэрин көмөтүнэн үөрэх бырагыраамаларын тэрийэр. Онно анимация, фильммейкинг, архитектура, медиа, ас-үөл индустрията уо.д.а. киирэллэр. Бүгүҥҥү күҥҥэ Паарка оҕо аймаҕы креативнай эйгэҕэ сыһыарар уонна көҕүлүүр сир буолар.
“Инники кэскил туһугар” биэс сыллаах целевой бырагырааманы таһынан, АЛРОСА хампаанньа 2019 сылтан Бүлүү бөлөх улуустарыгар билим-чинчийэр үлэлэрин өйүүр уонна олохтоохтору ыраас уунан хааччыйар.
АЛРОСА уонунан сыллар тухары өрөспүүбүлүкэҕэ оҕо успуорда сайдыытын өйүүр. Соторутааҕыта буолан ааспыт “Азия оҕолоро” VIII Аан дойдутааҕы оонньууларга биһиги Пуондабыт уонна АЛРОСА генеральнай партнер быһыытынан кыттыста. Тэрээһин үрдүк таһымнаахтык бэлэмнэнэн уонна киэҥ хабааннаахтык ыытыллан, Оонньуулар аҥаардас Саха сирин эрэ буолбакка бүтүн дойду спортивнай олоҕун бэлиэ түгэнэ буоллулар.
Бу сыллар тухары биһиги үгүһү ситистибит, онон киэн туттабыт! Ситиһиибит – кыттыһан үлэлэһии үтүө түмүгэ. Сыалбытын-сорукпутун ситиһиигэ уонна таһаарыылаах үлэ туһугар бэриниилээх буолан, үрдүк чыпчаалларга дьулуһабыт!
Тыһыынчанан үлэһиттээх АЛРОСА кэлэктиибигэр үрдүктэн үрдүк ситиһиилэри, сайдыыны баҕарабыт!
Саха сирин Үүнэр көлүөнэ пуондата
