Арктиканы сайыннарыы уонна СӨ хотугу норуоттарын дьыалаларын миниистирэ Владимир Черноградскай иһитиннэрбитинэн, өрөспүүбүлүкэ субсидия аныырын түмүгэр Арктика улуустарын бэкээринэлэрин саҥардыбыттар уонна маҕаһыыннары арыйбыттар.
«Ол курдук, 2023 сылга «Фактория уонна К» ХЭТ Усуйаана улууһун Нижнеянскай сэлиэнньэтигэр саҥа бэкээринэни, оттон Эдьигээн улууһун киинигэр ИП Попов Г.А кондитерскайдаах бэкээринэни арыйдылар», – диэн миниистир кэпсиир.
Бырабыыталыстыба Арктика зонатыгар бэкээринэлэри саҥардарга субсидияны 2022 сылтан «Саха Өрөспүүбүлүкэтигэр Арктика зонатын уонна аҕыйах ахсааннаах төрүт олохтоох норуоттары сайыннарыы» тосхолунан аныыр. Ол түмүгэр икки сыл иһигэр Анаабыр, Аллайыаха, Үөһээ Дьааҥы, Эдьигээн, Муома, Аллараа Халыма уонна Усуйаана урбаанньыттарыгар 19 субсидия анаммыта. Бэриллибит үбү сүрүннээн үлэлии турар бэкээринэлэргэ астыыр тэрили уларытарга уонна саҥаны атыылаһарга туһаммыттар.
Быйыл субсидияны туһаныыга ороскуот көрүҥүн: атыылаһарга, астыыр тэрили тиэйэргэ, бэкээринэ дьиэтин өрөмүөннүүргэ, бэл диэтэр, бэкээринэҕэ саҥа модульнай тутууну атыылаһарга – диэн кэҥэтэн биэрдилэр.
Соторутааҕыта өрөспүүбүлүкэ бүддьүөтүттэн субсидияны үллэриигэ урбаанньыттары талыы түмүктэннэ. Онон, Аллайыаха, Үөһээ Дьааҥы, Эдьигээн уонна Орто Халыма улуустарыттан алта урбаанньыт көмө ылар буоллулар. Балартан Үөһээ Дьааҥы урбаанньыта Баатаҕайга модульнай тутууну атыылаһан бэкээринэ тэринэр санаалаах.
Эрэдээксийэттэн: Хоту сиргэ бэкээринэлэри саҥардыыга көмөлөһүү баара олус үчүгэй. Онуоха, Сахабыт сирин сорох нэһилиэктэригэр үлэлии турбут бэкээринэлэр өйөбүл суоҕуттан сабыллан хаалбыттарын билэбит. Онон, ааҕааччылартан нэһилиэк бэкээринэлэрин туһунан иһитиннэрии күүтэбит.
Сонун төрдө: СӨ Бырабыыталыстыбатын уонна Ил Дарханын пресс-сулууспата
