Регион оперативнай ыстааба иһитиннэрбитинэн, айылҕа быһылааныттан уонна да атын ыксаллаах быһыыттан-майгыттан эмсэҕэлээбиттэргэ көмө харчы кээмэйин улаатыннардылар.
Маннык төлөбүр кээмэйэ өрөспүүбүлүкэҕэ 2017 сылтан уларыйбакка турбут. Ол эбэтэр, эмсэҕэлээччилэргэ муҥутаан 25 тыһ. солк. көмөнү ылар этилэр. Аны, төлөбүр кээмэйэ 110 тыһ. солк. диэри тиийэр кыахтанна.
Холобура, саҥа тарыыбынан биир киһиэхэ көрүллэр көмө харчы кээмэйэ икки төгүл үрдээн 10 тыһ. солк. буолла. Туга да суох хаалбыт дьоҥҥо көрүллэр көмө харчы биэс төгүл үрдээн 100 тыһ.солк. тиийдэ (бас билэрин сорҕотун сүтэрбит буоллаҕына - 50 тыһ. солк.)
Экология министиэристибэтин дааннайынан, Нам, Өлүөхүмэ, Ньурба улуустарыгар халаантан 3 384 киһи эмсэҕэлээбит. Кинилэр көмөнү ыам ыйын 24 күнүгэр олохтоммут саҥа тарыыбынан ылыахтара.
Сонун төрдө: Регионнааҕы оперативнай ыстаап
Хаартыска: Нам улууһун дьаһалтата
