2024 сыл муус устар ыйыгар Марха 1 №-дээх орто оскуолатын саҥа куорпуһун тутуу саҕаламмыта. Үс этээстээх дьиэ 5,8 тыһ. кв.м. иэннээх, 326 миэстэлээх. Манна 5-11 кылаастар үөрэниэхтэрэ. Эбийиэги сыл бүтүүтэ тутан бүтэриэхтэрэ.
Саҥа куорпуска лабораториялардаах химия, биология уонна физика кэбиниэттэрэ, үлэ уруогар аналлаах мастарыскыайдар, мэдиссиинэ кэбиниэтэ, суунар сирдээх успуорт саалата, 300 миээстэлээх аахтабай саала, аныгы бибилэтиэкэ уонна эбиэттиир саалалаах остолобуой баар буолуохтара. Мантан сүрүн куорпуска сылаас көрүдүөрүнэн барыллар.
Саҥа куорпуһу «СЭТТЭ» ХЭТ «Дьокуускай» 12 №-дээх орто оскуолатын бэлэм бырайыагынан тутар. Күн бүгүн эбийиэк 30%-на бэлэм. Оскуола дириэктэрэ Мария Стручкова: «Саҥа куорпус үлэҕэ киирдэҕинэ оҕолор биир симиэнэн үөрэнэр буолуохтара, бары абыраныахпыт. Үөрэҕи эбии дьарыктары, куруһуоктары, успуорду кытта дьүөрэлииргэ табыгастаах усулуобуйа баар буолуо», - диэн үөрүүтүн үллэһиннэ.
Марха 1 №-дээх орто оскуолата Дьокуускай куорат биир кырдьаҕас оскуолатынан буолар. Манна 907 оҕо 29 кэмпилиэк-кылааска үөрэнэр. 2024-2025 үөрэх сылыгар маҥнайгы кылааска 115 оҕо киирээри бэлэмнэнэр.
Сонун төрдө: Дьокуускай куорат уокуруктааҕы дьаһалтатын пресс-сулууспата
