«Мой бизнес» киин «Куйаар ситимҥэ угуйук маркировката: сокуон ирдэбиллэрин билии уонна туһаныы» күнүскү сэминээри тэрийэн ыытта. Бу билигин олус тоҕоостоох тиэмэ буолар, тоҕо диэтэххэ, фрилансердартан саҕалаан улахан урбаанньыттары барыларын таарыйар. Эбиитин ирдэбили тутуспат дьоҥҥо ыстыраап кээмэйэ олус улахан.
Тэрээһин испиикэрдэринэн «Утум+Консалт» тэрилтэ дириэктэрэ Анастасия Максимова уонна yakutskgo.ru саайт бас билээччилэриттэн биирдэстэрэ, сайыннарыыга дириэктэрэ, маркетолог Айталина Ноговицына буоллулар. Кинилэр куйаар ситимигэр угуйук маркировкатыгар ирдэбиллэри үөрэттилэр уонна тус уопуттарыттан кэпсээтилэр .
Сэминээр кэмигэр урбаанньыттартан элбэх ыйытыы киирдэ, ол түмүгэр туһалаах ырытыһыы таҕыста. Холобура, бэйэ дьарыктаах Александра Коули дьоҥҥо англия тылын үөрэтэр уонна иистэнэр эбит, онон социальнай ситимҥэ угуйугу хайдах сөпкө таһаарары билээри кэлбит.
Ити курдук «Мой бизнес» үлэһиттэрэ «Аччыгый уонна орто урбаан» национальнай бырайыак иитинэн урбаанньыттарга араас көрүҥнээх көмөнү оҥороллор. Ол туһунан сиһилии «Мойбизнес14.рф» порталга эбэтэр 8(800)100-58-80 нүөмэрдээх аһаҕас лииньийэҕэ эрийэн билиэххитин сөп.
Сонун төрдө: «Мой бизнес» киин
