Атырдьах ыйын 6 күнүгэр Перинатальнай кииҥҥэ ыам ыйын 2 күнүгэр төрөөбүт үс игирэчээни үөрүүлээх быһыыга-майгыга дьиэлэригэр таһаардылар. Анастасия уонна Владислав Степановтар бастакы оҕолоругар Лея, Мила уонна Юна диэн ааттары биэрдилэр. Арыый эрдэ күн сирин көрбүт кырачааннар үс ый устата быраастар кэтэбиллэригэр сырыттылар, ыйааһыннарын 3 киилэҕэ тиийэ эптилэр.
Дьиэ кэргэҥҥэ үс оҕоломмуттарынан сибээстээн маннык өйөбүл оҥоһулунна:
-
Хас биирдиилэригэр «100 сыл оҕолоро» туc cыаллаах хапытаал;
-
Бастакы оҕоҕо биир кэмнээх төлөбүр;
-
Иккис оҕоҕо регионнааҕы ийэ хапытаала;
-
Үһүс оҕоҕо өрөспүүбүлүкэтээҕи «Дьиэ кэргэн» хапытаала;
-
Үс оҕо төрөөһүнүгэр биир кэмнээх босуобуйа;
-
Үс оҕоҕо биир кэлим босуобуйа;
-
Бастакы, иккис оҕоҕо федеральнай ийэ хапытаала.
Маны таһынан өрөспүүбүлүкэҕэ үс эбэтэр үстэн элбэх оҕону төрөппүт дьиэ кэргэҥҥэ олорор дьиэни атыылаһыыга (туттууга) биир кэмнээх төлөбүр көрүллэр. Үс игирэлээх дьиэ кэргэҥҥэ төлөбүр кээмэйэ 4,6 мөлүйүөн солкуобай буолла. Бу харчынан эдэр төрөппүттэр кыбартыыра атыылаһыахтарын баҕараллар.
Сонун төрдө: СӨ Үлэ уонна социальнай сайдыы министиэристибэтэ
