Бэҕэһээ, атырдьах ыйын 11 күнүгэр, киэһэ 22:25 чааска СӨ Быыһыыр сулууспатыгар Булуҥ улууһун Күһүүр сэлиэнньэтиттэн 20 км тэйиччи Өлүөнэ өрүс кытылыгар турар балыктыыр учаастакка сааһын ситэ илик үс кыыс сүппүтүн туһунан суһал иһитиннэрии киирдэ.
Оҕолору бүтэһигин кытылга оонньуу сылдьалларын көрбүттэр. Онтон кэтэ сылдьыбыт таҥастарын булбуттар. Кинилэр сөтүөлүү киирэн баран тимирэн өлбүттэрэ сабаҕаланар. Кыргыттар 2009, 2010, 2013 сыллааҕы төрүөхтэр. Быһылаан буолбут чахчытынан холуобунай дьыала тэрилиннэ.
Бэҕэһээ олохтоохтор бэйэлэрэ көрдөөбүт буоллахтарына, бүгүн киин куораттан водолазтар тиийэн көрдүөхтэрэ.
Сонун төрдө: РФ СК Саха сиринээҕи управлениета
