Атырдьах ыйын 13 күнүгэр киэһэ 19 ч. 30 саҕана Таатта улууһун Харбалааҕын биэлсэриттэн ГАИ сулууспатыгар Мординов уулуссатыгар матасыыкыл 3 саастаах кыыһы түҥнэри көппүтүн туһунан иһитиннэрии киирбит. Комаҕа киирбит, ыарахан туруктаах кыыһы тута улуустааҕы киин балыыһаҕа илдьибиттэр. Итэҕэллээх ситимнэр нүөмэрэ суох матасыыкыл кырачааны түҥнэри көтөн баран күрээбитин суруйбуттара. Миэстэтигэр силиэстийэлиир-оперативнай бөлөх үлэлии тиийбитэ.
Бэҕэһээ СӨ Доруобуйа харыстабылын министиэристибэтэ иһитиннэрбитинэн, кырачаан туруга олус ыарахан. Өрөспүүбүлүкэтээҕи 1-кы №-дээх балыыһа (НЦМ) Педиатрия киинин быраастарын кытары телемэдэссиинэ сүбэтэ оҥоһуллан, оҕону миэстэтигэр суһаллык эпэрээссийэлээбиттэр. Туруга мөлтөх буолан, кинини куоракка киллэрэр кыах суох эбит. Билиҥҥитэ оҕо туругун Национальнай мэдиссиинэ киинин исписэлиистэрэ кэтээн көрөллөр, билсэллэр уонна санавиациянан Дьокуускайга аҕалаары бэлэмнииллэр.
Кэнники биллибитинэн, эмсэҕэлээбит кыысчаан эбэлээх эһэтигэр сайылыы кэлбит. Кинини аҥаардас аҕата иитэр эбит, ийэтэ өлөөхтөөбүт. Оттон матассыыкыл уруулугар эмиэ куораттан сайылыы кэлбит 16 саастаах уол олорбут. “Официальнай иһитиннэриигэ ыйыллыбытын курдук, матасыыкыллаах уол саспатах, төттөрүтүн кыыһы балыыһаҕа илдьэргэ көмөлөспүт” диэн олохтоохтор кэпсииллэр. Кыысчаан массыына кэнниттэн эмискэ сүүрэн тахсыбытыгар, уол баттаһа охсон туормастаабатах. Быһылааҥҥа бэрэбиэркэ ыытыллар.
Бэйэ кэр.
