Бу күннэргэ «Анаабыр алмаастара» АУо «Молодо» бириискэтигэр сыллата тэриллэр хамаанданан бастыыр иһин футбол буолан ааста. Сүрүннээн "Молодо Хотойдоро" уонна "Далдын" успуорт түмсүүлэрин футболистара хатыйсыылаахтык оонньоотулар. Бу икки успуорт түмсүүлэрэ кэнники үс сылга олбу-солбу бастыыр этилэр.
Ол курдук, урукку "Заря" ФК оонньооччута Олег Кривошапкин, "Алмазы АЛРОСА" Мииринэй ФК уопуттаах оонньооччута Вячеслав Ярославцев, эмиэ уруккута футбол диэн баран муннукка ытаабыт Матвей Васильев, Егор Захаров курдук тэтиэнэх оонньооччулар бааллара күрэхтэһиини биллэ сэргэхситтэ.
Быйылгы күрэххэ «Цех Доводки» хамаандата даҕаны өттүк харалаах, илии тутуурдаах хаалла. Манна минералог Тургун Егоров, маастар Михаил Сыроватскай эмиэ дьаныардаахтык кииристилэр.
Кэлин «Гараж» хамаанда биллэ эбилиннэ. Кинилэр ааспыт волейбол күрэҕэр бастакы, оттон бу футбол күрэҕэр үһүс миэстэҕэ тиксэри ситистилэр. Бу боччумнаах көрдөрүү. Сааһырдым диэбэккэ, хотторон эрэбин диэн хомойбокко, эдэрдэри көҕүлээн ветеран суоппар, БелАЗист Иван Местников "Горняк" хамаандаҕа бүтэһигэр диэри кииристэ.
Маннык күрэхтэһиилэр вахтаҕа өр кэмҥэ сылдьар дьон өй-санаа өттүнэн түмсэллэригэр, эт-хаан өттүнэн сэргэхсийэллэригэр улахан туһалаахтар. Алмаас сууйар сезон бүтүө өссө да ыйтан ордук хаалла.
Мичил ГУРЬЕВ, «Молодо» бириискэ үлэһитэ.
