Атырдьах ыйын 20 күнүгэр Чурапчы улууһун Бочуоттаах бэтэрээнэ Матрена Никитична Слепцова 100 сааһын туолла. Кини дойду бэрэсидьиэнэ Владимир Путинтан, Ил Дархан Айсен Николаевтан эҕэрдэ сурук уонна улуус баһылыга Степан Саргыдаев илиититтэн «Үйэ саас» бэлиэни үөрүүлээх быһыыга-майгыга тутта.
Матрена Никитична 1924 сыллаахха Таатта оройуонун Баайаҕа сэлиэнньэтигэр күн сирин көрбүтэ. Аҕа дойду сэриитин кэмигэр КПСС РК сэкирэтээр-машиниһынан, онтон бухгалтерга үөрэнэн Чурапчытааҕы лесопууҥҥа суотчут-кассирынан, тутуу учаастагар сэкирэтээр-кассирынан үлэлээбитэ. 1949 сыллаахха сэрии бэтэрээнэ, САССР үтүөлээх тутааччыта Николай Васильевич Слепцовтуун ыал буоланнар, 6 оҕону төрөтөн улаатыннаран, халыҥ аймаҕы тэниппиттэрэ.
Ытык кырдьаҕас I, II истиэпэннээх «Ийэ Албан аата» мэтээлинэн, Аҕа дойду Улуу сэриитигэр Кыайыы үбүлүөйдээх мэтээллэринэн, III истиэпэннээх «Оройуон иннигэр үтүөлэрин иһин» улуус бочуоттаах бэлиэтинэн наҕараадаламмыта. 2022 сыллаахха киниэхэ «Чурапчы улууһун Бочуоттаах бэтэрээнэ» аат иҥэриллибитэ.
Сонун төрдө: СӨ Үлэҕэ уонна социальнай сайдыыга министиэристибэтэ
