Дьокуускай куорат дьаһалтата атырдьах ыйын 27 күнүгэр бэлиэтэнэр Аан дойдутааҕы буокса күнүгэр Орджоникидзе болуоссатыгар идэтийбит таһымнаах буокса киирсиитигэр ыҥырар. Тэрээһин Саха сиринээҕи буокса федерациятын уонна «Сахапрофбокс» промоутерскай хампаанньа өйөбүлүнэн ыытыллар.
Манна буоксаҕа успуорт маастарыгар хандьыдаат, 20 саастаах Олимпийскай эрэллэри иитэр училище устудьуона Николай Макаров 4 рауннаах киирсиигэ «Peek-a-boо» буокса кулуубун тириэньэрэ, 24 саастаах Айаал Васильевтыын күөн көрсүөҕэ. Ол иннинэ болуоссакка көрөөччүлэргэ анаан Арассыыйа буоксаҕа успуордун маастара Нурсултан Халыкбаев уһуйар дьарыгы ыытыаҕа.
Онон, киин куорат олохтоохторо атырдьах ыйын 27 күнүгэр 13 чааска Орджоникидзе болуоссатыгар кыл түгэҥҥэ буоксаһыт курдук сананыахтарын уонна эдэр дьону өйүөхтэрин сөп.
Сонун төрдө: Дьокуускай куорат уокуруктааҕы дьаһалтатын пресс-сулууспата
