Түөрт дойдуга олорор бырааптаах гражданины, Telegram мессенджеры төрүттээбит Павел Дуровы атырдьах ыйын 24 күнүгэр Франция «Ле Бурже» аэропордугар тутан хаайдылар. Арассыыйа посольствота кинини көмүскүүр быраабы ыла сатыыр да, кыаллыбат. Кини, Арассыыйаны таһынан, ОАЭ, Сент-Китс уонна Невис, ону сэргэ Франция олохтооҕо буолар.
Биллиилээх бизнесмени, туһааннаах уорганнары кытта үлэлииртэн аккаастаммытын иһин, мессенджер нөҥүө наркодилердарга, педофилларга уонна түөкүттэргэ көмөлөһөр диэн буруйдуулар. Онуоха, Telegram салалтата мессенджер ЕС сирдэригэр ирдэнэр сокуону барытын тутуһан үлэлиирин тоһоҕолуур. Оттон Дуров бэйэтэ этэринэн, кинини АХШ уонна РФ өттүттэн күүскэ ыгаллар-түүрэллэр.
Дуров Арассыыйаттан 2014 сыллаахха ОАЭ көһөн барбыт. Ол төрүөтүнэн ити дойдуга дохуоттан нолуок тутуллубата уонна «бырабыыталыстыба туһатыгар 180 күн үлэлиэн баҕарбата» буолбута. Онон, кини төрүттээбит Telegram мессенджерын ыстаап-кыбартыырата Дубайга баар.
Билигин Павел Дуров Forbes миллиардердарын рейтининэн ОАЭ баайдарын испииһэгэр бастакынан турар. Кини туруктаах баайа 15,5 млрд дуолларга тэҥнэһэр.
Бэйэ кэр.
