Биллиилээх айанньыт, Өймөкөөн сылгыһыта Дугуйдаан Винокуров хаартысканан үлэлэрэ Бүтүн Арассыыйатааҕы «Дальний Восток – Земля приключений» диэн бастыҥ айан иһин куонкурус бастакы сезонун финалыгар киирэннэр, Владивосток куорат аэропордугар уонна Революция болуоссатыгар быыстапкаҕа турдулар.
Былырыыҥҥы куонкуруска кини Өймөкөөнтөн Магадаҥҥа диэри атынан айанынан «Зимнее путешествие» номинацияҕа үһүс миэстэни ылбыта. «Бу айанынан мин саха сылгытын уратытын, тулуурун уонна күүһүн көрдөрүөхпүн баҕарбытым. Ол табылынна дии саныыбын. Биһиги, аныгы дьон, өбүгэлэрбит сылдьыбыт суолларынан эмиэ сылдьар кыахтаах эбиппит», – диэн айанньыт бэлиэтээтэ.
Билигин куонкурус иккис сезонугар үлэлэри тутуу бара турар. Онно Уһук Илиҥҥэ айан туһунан 8 мүнүүтэттэн уһуна суох киинэни уһулан ыытыллыахтаах. Сайаапкалары бу сыл тохсунньу 30 күнүгэр диэри туталлар. Номинация кыайыылаахтара – 1 мөл. солк., иккис миэстэҕэ – 300 тыһ. солк., үһүс миэстэҕэ – 100 тыһ.солк. уу харчынан наҕараадаланыахтара.
Маны таһынан, Чукотка автономиялаах уокуругун губернатора Владислав Кузнецов бу эрэгийиэҥҥэ айаны сырдаппыт кыайыылаахха 1 мөл. солк. анаата.
Сонун төрдө: СӨ Бырабыыталыстыбатын уонна Ил Дарханын пресс-сулууспата
