Улуус биир кэлим диспиэччэрдэрин сулууспатыгар атырдьах ыйын 28 күнүгэр Эйик сэлиэнньэтиттэн 2010, 2013, 2018 с. т. оҕолор сүппүттэрин туһунан иһитиннэрии киирбит. Кинилэр үһүөн бу ыалга иитиэх оҕолор буолаллар.
Оҕолор суохтарын иитэр аҕалара сарсыарда биэс чааска көрбүт. Кини этэринэн, түүн үс чааска бааллар эбит. Бу сайын эмиэ бара сылдьыбыт уонна төттөрү бэйэлэрэ кэлбит курдуктар. Бу сырыыга оҕолор үрүксээктээх барбыттар.
Билигин оҕолору олохтоох нэһилиэнньэ күүһүнэн көрдүүллэр, 8 квадроциклы уонна 2 БПЛА-ны туһаналлар. Эйиктэн чугас СӨ Быыһыыр сулууспатын Ньурбатааҕы этэрээтэ баар. Быыһааччылар көтөөрү сылдьаллар.
Эрэдээксийэттэн: Бу быһылаантан «Иитэр аҕа түүн үс чааска утуйбакка тугу гына сырытта? Улахан оҕо кыралары тоҕо илдьэ барда? Ама куоттарбыта буолуо дуо?» диэн ыйытыы үөскүүр.
Сонун төрдө: СӨ Быыһыыр сулууспата
