Атырдьах ыйын 28 күнүгэр Сунтаар улууһун Кириэстээх сэлиэнньэтин Соколиная коса диэн сирин аннынан Бүлүү өрүскэ Чернышевскайдааҕы балык собуотугар искэхтэн таһааран улаатыннарыллыбыт 20 тыһыынча сибиир хатыыһын ыаматын ыыттылар. Манна экчи 75 сыл анараа өттүгэр саха алмааһын аан бастакы 22 кристалла көстүбүтэ.
Ааспыт 2019-2023 сылларга Бүлүү өрүскэ 140 тыһыынчаттан тахса сибиир хатыыһын оҕотун ыыппыттара. Бүлүү бөлөх олохтоохторо сыаналаах балык элбээн иһэрин бэлиэтииллэр диэн суруйаллар. Ол эбэтэр, бу миэрэ үтүө түмүктээх диэн этиэххэ сөп. Онон, СӨ Экологиятын министиэристибэтэ Саха сирин өрүстэригэр муҥур, туут уонна чорбоҕор балыктары элбэтэр санаалаах.
Эрэдээксийэттэн: Хатыыс Арассыыйа уонна Саха сирин Кыһыл кинигэлэригэр киирбит көрүҥ буолар. Онон, көҥүлэ суох бултааһын холуобунай эппиэтинэһи уонна мөлүйүөнүнэн ыстараабы модьуйар. Дьон хатыыһы бултаан суорума суолламмыт түгэннэрин өйдүүргүт буолуо.
Сонун төрдө: СӨ Бырабыыталыстыбатын уонна Ил Дарханын пресс-сулууспата
